守護天使，撇開宗教意思，一般用作名詞，而當名詞配上何雁詩，則搖身一變成了動詞。
事源她跟老公鄭俊弘，最近公開了兩歲的兒子Asher，患有罕見病天使綜合症，「係一個基因嘅病，小朋友會發展遲緩，就算成年之後，智商都係2至4歲左右。全香港就有60個患者左右。」
病在兒身，痛在父母心，31歲的何雁詩，坦言用了一個星期去平伏心情，然後將之化為力量。
「我對工作嘅熱誠大咗，因為要搵多啲錢養小朋友，令佢以後嘅生活可以舒服啲，又好想俾佢睇到，媽咪唔止係媽咪嘅身分，仲對好多嘢都仍然好有熱誠。
「我覺得要身體力行，去Prove（證明）俾阿仔睇，做咩都要全情投入。」
除了守護囝囝、努力經營事業，高爾夫球運動員出身的媽媽，去年尾也尋回自己昔日的蹤跡，重拾球桿。訪問這天，她帶全副武裝到場。
「做媽咪好多時會好容易緊張，但當我有我嘅事業、喜好，我喺心態上會平衡啲，唔會有好多Stress（壓力）喺個仔度。」
一見何雁詩的球桿套，是搶眼醒目的老虎仔，問她是否代表屬虎的囝囝時，她秒回：「係Tiger Woods呀！」
守護天使，除天使本尊，原來還有其他值得守護的地方。

正面抗壓

兒子患上罕見的遺傳病，為人母的何雁詩怎能不擔心？不過，她視之為命運的安排，所以於Asher證實患病後，她沉澱一周便決定要重新振作。
「嗰刻我同老公都知道，唔可以俾自己嘅情緒沉淪落去，既唔係辦法，而我哋唔振作嘅話，佢（兒子）就無依無靠。」
照顧加陪伴，夫婦二人也積極發掘兒子的興趣所在，「我哋兩個唱歌，佢都鍾意嘅，但最鍾意係聽到爹哋彈結他，佢老竇一彈，佢就想伸隻手埋去，所以我都買咗一個細嘅Ukulele俾佢，哈哈！佢彈到好似彈古箏咁。」
雖然現在Asher還未懂說話跟走路，但他對敲擊的節奏特別敏感，每天也接受物理及言語治療，以其獨有的節奏成長。
「有支撐嘅話，佢扶住可以企，佢都鍾意企，而且識得企之後都有要求，係仲未識行。佢一定唔可以跟上正常小朋友嘅節奏，佢嘅節奏係，每一日都有進步。」

追夢野馬

更加珍惜每一個當下，繼續帶着囝囝外遊、成為主題樂園常客，是何雁詩的日常。
「阿仔好鍾意食日本嘢，啲茶碗煮、燒魚⋯⋯之前我同朋友兩家人，三代同堂去大阪旅行，當時天氣凍，係阿仔最鍾意嘅天氣，所以佢去到好開心，食嘢又好乖。平時佢食嘢都扭計嘅，而且好似𠵱家咁嘅天氣，佢就會易𤷪𤺧啲，哈哈！」
身兼事業的「兩職媽媽」，何雁詩暫時「犧牲」了自己的創作空間，所以她並未參與創作其新曲〈野馬〉。
「原本屋企嘅Studio，𠵱家變咗BB房，部琴就搬咗出廳，我𠵱家彈琴，隔籬就有人睇電視，所以好難專心，要喺屋企創作就難上加難。」
只要是好歌，又代表到歌者心境，出處已非重點。「首歌係因為填詞人見到我喺IG，賣我架『野馬』跑車，覺得我一個女仔，揸架咁有男子氣概嘅車，好切合我嘅性格。
「歌入面最後一句：『朝無盡發放』，又高音，就好似好聲嘶力竭去爭取我生活上嘅夢想，同我𠵱家嘅狀態好相似，都係一路去做，希望有一日會有好嘅結果。」

這就是愛

身體力行當囝囝的榜樣，何雁詩還有老公同行，她坦言，鄭俊弘是不可多得的「神隊友」。
「佢係我永遠可以依靠嘅人，喺我對將來有擔心嘅時候，都有另一個人同我一齊去度過；同埋喺我軟弱嘅時候，佢係好強大嘅，相反都係，大家互相補位，我覺得係一件好幸福嘅事情。」
二人結婚快將4年，而他們的專屬䁥稱，是「Nilk」和「Nilp」，代表老公和老婆，她了解「Nilk」表達愛的方式，並不需要儀式感。
「喺我需要佢嘅時候，佢永遠都會喺度嘅。你有冇聽過『Love language』嘅『Acts of service』呀？就係用行動去表達，好似今日，就係佢車我過嚟；如果我有咩漏咗冇帶，佢又會拎俾我⋯⋯呢啲都係佢表達愛嘅方式。」
「而我表達愛嘅方式，係瞓覺嘅時候，隊隻腳埋去鉗住佢，但係佢最憎㗎！哈哈！」
現在二人也互相補位照顧囝囝，即將為巴黎奧運擔任主持的她，囝囝就由老公看顧；到她工作完成後，就補上要演出音樂劇的老公的位置。不過，今年初她也曾自製Me time，獨遊巴黎、倫敦。
「都係多謝佢睇住阿仔！其實我以前都成日自己去旅行，但後來結咗婚，跟住又Covid，就冇機會咁做。然後今年突然間，我好Last minute咁買咗張機票去旅行。
「去巴黎，又去咗波爾多嘅酒莊飲紅酒，嘩！好正！再去倫敦一日，見番個舊同學。」
忙裏偷閒的Me time，特別珍貴。

J得人妻?

J，早已由家長指引類別，進化至老少咸宜級別，泛指從外界人事物中，得到愉悅、療癒的感覺。
多得網友搜索，何雁詩也屬J-able之列。
當事人聞言，先是大笑，附帶一句：「都30幾歲啦！人妻J咩？哈哈哈！」
回過氣後，她笑言：「我老公應該唔會上網Search我個名，但J都幾好吖，係唔知用咗幾多年儲咗啲數據落嚟嘅，可能啲人10幾年前Search，個數儲到𠵱家。」惟她沒有掩藏嘴角的笑容。
說她於IG「派福利」，「哦——泳衣嗰啲，都好，至少仲有人覺得我係女人吖嘛。」
J，還有另一個意思，16型人格MBTI中的J，代表凡事有條理、有規劃，為了兒子，會即興去旅行的何雁詩，也開始為未來打算，看至此頁的你，大概已掌握了情況。
人生路上，充滿太多的未知數，從過程中獲取經驗值而成長，才是最J-able。