發佈時間：16:08 2024-04-23
每年的三、四月，是繁花滿開的季節。
黎瑞恩上月底，就與友人即興前往新疆南部賞杏。一行四人租了一輛簇新的越野車，再請來資深嚮導，沿着314國道，跑上帕米爾高原。沿途走訪了白沙湖、班迪爾藍湖、奧依塔克紅山峽谷和盤龍古道等著名景點，又深入山區村落，探訪原住族民。
雖然途經山谷期間，突然遇上巨型落石擋路，但總算有驚無險，十日之旅，天天享受着無添加的美景盛宴。
「其實每個地方都有其獨特風貌，除咗一啲好著名嘅景點，就連公路周邊的景色都超靚，原始得嚟又零污染，美不勝收。」
湖泊河川杏花處處
早已到過新疆北部遊玩的黎瑞恩，今次重遊新疆，但就選擇到南部高原，細賞震懾人心的壯麗風景，「我去任何一個地方，都係失驚無神想去就去。上月底見到好友傳來新疆南部城鎮杏花盛放的短片超靚，便決定馬上起行，前後只用了三日時間準備。
「我們一行四人，從深圳出發，飛去成都再轉機去喀什，落機後租了一架落地只有兩日的全新坦克500越野車，正式開始南彊旅程。因為在當地人生路不熟，所以找了一位熟悉當地的導遊隨行，有乜事，例如爆軚都有人救吖嘛！」
他們駕車走遍米帕爾高原的著名景點，包括白沙湖、班迪爾藍湖等地，看無添加的自然風光，「每個地方都好靚，公路周邊的城鎮風景亦好倚麗，沿途亦有不少河川。周邊盛放的杏花，有些深粉紅，有些淺粉紅，仲有其他顏色，加上綠油油的樹木，構成超美麗的畫面。」
峽谷滾石擋路遇險
每次外遊，黎瑞恩都愛租車自駕，「因為每個景點的距離很遠，即使點對點，都最少要三小時車程，自駕遊比起包車，更加不受時間和地域限制，方便隨時去想去的地方遊覽。全程有70%時間都係我揸，因為我實在太鍾意揸車，過程亦唔覺得辛苦。但當我『中』咗高山症，就會交俾朋友代駕，因為行程最高上到海拔4,000幾米，都有啲高山反應。」
他們駕車去到邊玩到邊，每天都風和日麗，在盤龍古道、奧依塔克紅山峽谷打卡，因地勢高，在藍天白雲下，照片拍得尤其震憾。期間在奧依塔克紅山谷，他們更遇上驚險事。
「我哋沿着公路前行，經過好多古老城鎮，部分依山而建，但不時會遇到好多泥石跌落嚟，那刻就要馬上停車，睇清楚周邊環境安全先再開車，有次仲俾幾塊跌落嚟的巨石擋路，都幾驚險，好彩全程冇遇到好嚴重嘅事故。其實以往去唔同地方旅行，我都鍾意自駕遊，但為安全，每次租車我都只會揀落地半年的新車，仲買埋全保，即使有碰撞或意外都有得賠。」
少數族民熱情款待
行程除了觀賞壯麗山河，黎瑞恩又去探訪了一些少數族裔部落，途上見到有族民的小朋友正在表演，他們又落車觀賞。黎瑞恩更將預先準備的糖果，分發給在場的小朋友。
「每次預計會入山區，我都會買定幾箱糖果和蛋糕，因為山區物資較貧乏，當帶啲手信去人哋屋企，見到小朋友就派糖，蛋糕就俾老人家。
「當地民風純樸，族民見到我哋都友善地打招呼，之後就繼續趕牛放羊。有啲族民見我哋到訪，仲攞咗好多碟家中最珍貴的合桃出來送俾我哋。」
由於旅程長達十日，黎瑞恩在出發前準備了大量物資，當中有不少罐頭和即食麵，「部分景點偏遠，且人跡罕至，唔會有食店，我哋喺野外泊低架車就地開爐煮公仔麵，仲同當地嘅導遊朋友一齊分享，佢哋食過都大讚好味。」
旅途上，她更品嘗了不少地道美食，「當地啲串燒特別好食，有雞、有牛、有羊，價錢又唔貴。近年當地城鎮都開了不少新餐廳，甚至連有豬肉的湘菜和廣東菜都有得食，十日行程充實又好玩。」
