人生在世區區數十個寒暑，誰不想活得燦爛？
87年港姐季軍林穎嫺﹙Wing﹚，當年在事業如日方中時，毅然選擇放棄璀璨星途，到美國洛杉磯升學，並在當地落地生根。
婚後誕下一子兩女的她，專心享受相夫教子的生活。隨着子女逐一入讀大學，近年她又再度活躍幕前，既開設個人YouTube頻道暢談在美的生活點滴，最近又出書，找來19位美國政商界人物，分享閱歷和經驗，教人締造燦爛人生。
而年前患上突如其來罕有病，做了下顎骨大手術，更令她明白健康的重要。
「成功可以代表好多嘢，但唔一定係金錢。我心目中嘅燦爛人生，係做到自己鍾意嘅嘢，如培育小朋友成才，擁有一個幸福家庭，最緊要有健康體魄同快樂心境，不過要做到真係唔容易。」
說時，她展露出招牌齙牙笑容。那些年的「14號佳麗林穎嫺小姐」，回憶立即返晒嚟！

變身YouTuber

久違了的林穎嫺，今次回港宣傳新書前，先到日本旅遊賞櫻，她笑說現在已仔大女大，有條件去過一些自己想要的生活。「三個小朋友都長大晒，我唔使再好似以前咁跟出跟入。大仔大學讀Berkeley，只在長假期才回家；二女讀UCLA﹙加州大學﹚近屋企，每逢weekend都會見面，不過最近她去夏威夷玩，叫我唔好跟住晒；而細女就已經好獨立，亦已準備入大學，只係未有車牌，出入要我接送。遲啲佢識揸車，那時我就真正free了！」
55歲的她在新書《如何活出燦爛人生》中，以過來人身份，親授華人如何在美國生活、培育子女和保持身形美態等多個範疇，「出呢本書係我bucket list裏面其中一項，趁我仲記得，將之前30幾年人生發生嘅事集結成書。由選港姐到結婚、生兒育女，加上搵了19位在美國知名的政商界人士，分享佢哋嘅人生經驗和故事。內容就儲咗30年，但真係動筆寫，就只用了個幾月完成。」
現於美容公司出任CFO﹙財務總監﹚的她笑言，工作毋需像傳統公司要朝九晚五坐定定喺度，因而令個人時間管理更有效率。「現在科技發達，即使身處世界任何角落，只要上到網就做到嘢，早排我喺日本都為新書睇稿同修改。我喺美容集團做CFO係顧問角色，專門做report提高公司效率。」
做了十多年全職家庭煮婦的她，於2020年再次走到幕前，並躋身YouTuber行列，「那時覺得生活應該要去另一個stage，所以plan定一些自己想要嘅生活。加上covid好多時間喺屋企，同朋友傾傾吓偈，就話不如錄低放上網分享，無論係自己嘅興趣，朋友遇到生活上的事，值得分享就拍，希望睇過我啲片嘅網友都學到嘢。」
由拍攝、剪片，她全部一腳踢，「我當年大學雖然修讀account，但空餘時間亦讀過電腦課程，識寫program，有電腦底，加上有個做影片嘅朋友教我，兩個鐘就學識剪片嘅技巧，遇到技術問題就上google、chatGPT搵解決方法，或者去YouTube睇片學。過去幾年其實拍拍埋埋好多片，但就仲未得閒剪。」

怪病突襲

過去數年，Wing的生活因患上一種罕見病，而起了翻天覆地的變化，「大約2019年，常常feel到肩頸肌肉痛，有時又頭痛，成晚扯住痛到瞓唔到，更不時聽到頸部發出一些『啪啪』聲響。去過診所、去ER睇咗好多醫生都搵唔出病因，最終有個朋友聽見我有呢啲症狀，幫我做research，再搵到一個有呢方面臨牀經驗嘅醫生接我個case。
「醫生話呢個病好罕有，100萬人都未必有一個。當年我鍾意搵人啪骨，加上睇手機，坐姿等令頸骨移位，壓住神經線，要做手術切除部分壓住神經線的組織，及拆短下顎骨。」
手術後，Wing需花上數月時間休養，至今仍留有疤痕。此事令她知道擁有健康體魄，比任何事都重要。「那次雖然未到經歷死亡咁嚴重，但亦係一個warning call，生活習慣亦因而改變好多。以前我比較任性，早上送完細女返學，就去shopping或工作。但現在會去做gym、游水、焗桑拿，每日keep住做一小時運動，又捉老公陪我打tennis。持續兩年後，做身體檢查，報告話我的心藏功能泊得住25歲，骨質密度亦能維持喺正常水平。」
俗語話有失必有得，Wing坦言康復期間，令她和子女關係更進一步，「細女嗰時成日寫卡寫信俾我，叮囑我don't give up, be storng，又煮嘢俾我食，令我覺得有好強大的back up。」
子女生性，歸功於Wing教導子女的方式，「就咁讀書唔夠，我好鼓勵小朋友放眼看世界。我絕對唔係一個虎媽，身份可以係導遊或者係一個Uber司機，帶佢哋去博物館、去party，過程可以學到好多書本學唔到嘅嘢。
「做家長其實就如一面鏡，如果父母夜瞓，叫子女早瞓，佢哋一定唔聽，你食煙、講粗口，佢哋一定跟。所以要做好榜樣，培養佢哋嘅價值觀，仲要有責任心，誠實和準時。當然由準備做媽媽開始，就要去實踐，到佢哋長大，就好難改變。」

婚姻考驗

Wing近年每次回港，行程都排得密麻麻，「好多圈中朋友好耐冇見，好似阿旦﹙鄭丹瑞﹚，真係三十幾年冇見過，但我哋見面一啲都唔陌生，好似老朋友咁關心問候，好warm。因為有社交網，大家都可以互相了解對方近況，再無地域距離，唔同以前要寫信、打IDD。
「我哋87年港姐亦有個whatsapp group，22位佳麗亦group番一大半，咁多年仲keep到。當中我同楊寶玲就經常聯絡，因為佢喺拉斯維加斯，同我居住地方好近，有時佢來探我，有時我去探佢，我細女18歲生日，佢都有同先生過來一齊開party。」
回想當初，膽粗粗一個人赴美留學生活，她笑言一切決定都不容易。「那時和TVB還有約，每年放暑假都回港工作，剪綵、拍廣告、MV、劇集乜都有，在香港日以繼夜，瞓覺時間都冇，最初返美國，清閒到可以睇住一隻烏蠅飛來飛去。那時年紀細，冇乜負擔，但我當時好享受喺美國嘅校園生活，我睇嘢比較長遠，想將來子女都喺同樣環境成長，所以畢業後就留在美國尋找工作機會。」
她因工作而認識丈夫Tom，二人志趣相投，一起走進人生另一階段。她笑言因文化差異，令到婚姻一度備受考驗，「拍拖時大家相處去玩冇問題，但有咗小朋友就出現好多問題。個仔2歲時，先生已帶佢跳崖，嗰度高到我個心都跳出嚟；冬天又帶個仔去游水，着件蛤乸衣就出去雪地玩，返到嚟個仔全身紫色嘅，但又冇事㗎喎！慢慢我先學識咗放鬆，互相學習。」
如今一家五口生活愉快，Wing找尋自己喜愛的生活，亦努力收身，希望能操出美魔女體魄。「美魔女係要青春常駐，但好睇身體同心境，事實係唔會返到去18歲，只能夠延遲老化。秘訣要有足夠睡眠、運動和做facial，可以延緩5年、10年，甚至20年，當然年年都保持到25歲體魄，梗係最好。」