《第四十二屆香港電影金像獎》頒獎典禮，於周日（4月14日）在香港文化中心舉行，已圓滿結束！
投身電影圈8年的余香凝（Jennifer），憑電影《白日之下》中飾演記者「凌曉琪」一角，首次勇奪「最佳女主角」，登上影后寶座；而梁朝偉就憑《金手指》，第6次登上影帝寶座，身處德國開工的他未能親自到場，由太太劉嘉玲上台代為領獎。
已是兩子之母的Jennifer，雖然近年的事業發展順利，但一直缺乏安全感。她接拍人生首部電影《骨妹》後，曾擔心只做「一片女星」；而在差不多3年前，她誕下大女後，亦驚恐沒有人再找自己拍戲，影后鏡頭下亦有其辛酸史！

鼻骨爆裂

一直被視為影后大熱，今年30歲的余香凝（Jennifer），早已憑電影《白日之下》在香港電影評論學會大獎中，獲得「最佳女演員」，以及在香港電影導演會年度大獎中，獲頒「最佳女主角」獎。2011年，Jennifer以模特兒入行，在屋邨長大。有樣貌、有身材的她，入行後拍過不少廣告，於2016年轉戰電影圈，接拍人生首部電影《骨妹》，當年更入圍「第三十六屆香港電影金像獎」，並獲提名「最佳新演員」。
感情方面，在2014年，Jennifer入行初期因與陳家樂合作港台劇《總有出頭天》而撻着。2017年，她於陳家樂駕車接載期間遇上車禍，傷及左邊臉部，導致鼻骨爆裂；而當時男方對她照顧有加，兩人一度視對方為結婚對象。可惜，在2018年中，Jennifer傳出在保險才俊家中留宿，陳家樂爆喊承認已分手，4年情就此玩完。2020年10月，Jennifer突然宣布與圈外男友陸政渡（Tim）結婚，同年11月在半島酒店舉辦婚禮，並於聖誕節宣布懷孕消息。翌年5月，她誕下大女Clare，去年9月再誕下細仔，湊夠一個「好」字。
首次封后的Jennifer，表示感激導演給予機會，還感謝老公幫手湊小朋友：「多謝簡君晉導演，我多謝佢100次都唔夠呀！佢打電話問我究竟仲想唔想演戲，問我嚟唔嚟casting？因為可能好多人會覺得，一個女人結咗婚、生咗小朋友，特別係做幕前，可能未必會繼續，佢都唔知我心態係點，就打嚟同我傾。我好多謝佢邀請我casting，亦都非常之信任我，覺得我適合呢個角色，令我可以攞到呢個獎！」
被問到今晚會否「生多個」慶祝一吓？她笑言：「今晚想食吓嘢、enjoy吓先！我頭先話多謝我先生，因為佢真係好辛苦，特別呢段時間，佢知道我好忙，所以每一晚都係佢湊小朋友，佢都有佢嘅工作，放工食完飯，小朋友瞓晒，佢仲要同我對劇本，幫我背對白，所以真係好多謝佢喺我身邊。」

做足功課

原來，Jennifer接拍《白日之下》前，曾有一段驚恐的日子：「生完大女後，我係好panic（恐慌）嘅，會成日諗，之後仲有冇人搵我做戲㗎？仲直頭試過喺屋企喊，我記得嗰刻抱住個女食飯，佢扭計，我就抱佢出去𠱁佢，望到條街有人拍緊戲，我係覺得呢個場面，離我好近又好似好遠咁。」她續說：「擔心之後，過咗幾個月，就有一部電影搵我做，當時我覺得，原來仲有人搵我㗎，接住就拍《白日之下》，所以其實都冇得擔心咁多，只要ready好自己，有機會嘅時候就好好去做。」
準備演出時，Jennifer都做足功課：「之前我對港聞記者係零認識嘅，而我嘅角色係有原型人物，我除咗同佢傾偈，仲搵咗另外一啲記者攞料，發現佢哋都好獨立，即係由搵料到寫稿，都係自己一個搞掂晒！」她又透露：「於是我就自己一個人，揸車去唔同嘅院舍，我係好唔鍾意揸車嘅，但為咗攞一啲記者嘅感覺，自己揸車，喺院舍睇人出出入入。」
看《白日之下》試映的時候，Jennifer憶述：「睇嘅時候，我仲佗緊細仔，啲同事都叫我唔好咁激動，好驚我動咗胎氣。」好彩沒事發生，但是她看罷都非常傷感。
現時，育有一對子女的Jennifer，要兼顧事業與家庭，一切也要計劃得宜。「我plan好晒時間表，湊咗大女返學，就可以陪細仔，就算𠵱家有兩個小朋友，我都想繼續做演員，因為我實在太鍾意演戲。」
頒獎禮後，Jennifer隨《白》片的團隊到尖沙咀天文臺道擦火鍋慶功。至凌晨1時半，飲飽食醉的她，乘7人車返回南昌站附近的私人屋苑。