去韓國旅行仲食部隊鍋、着韓服打卡？Out啦！不少絲打去韓國的首要Checkpoint，是觀賞音樂劇《Wild Wild 》，看靚仔爆肌Oppa們濕身半裸舞吧舞吧，更可近距離接觸，完全是乾柴遇上烈火，絲打火燒心失守，阿豬媽仿如被燃點冬天裏的一把火當場心花放，巴打們一樣火，係眼火爆個火呀！

音樂劇終於殺到香港，將於5月於亞博連演4場，其中三場專為女士而設，相信屆時天氣反常，熱度及濕度爆表！《Wild Wild 》隊長李國榮，日前率領成員姜天一及正韓泉出征香港造勢，《東周刊》特別請來香港絲打界最強代表「蝦頭」楊詩敏，與Oppa們作「身心靈」全接觸，親自測試Oppa有幾堅料幾Wild！

三位Oppa和蝦頭初見面時，雙方表現有禮，當Oppa們知道蝦頭的地位及威水史，包括曾角逐香港金像獎最佳女配角，表現驚訝，直豎拇指。雖然大家初見面，氣氛拘謹，但不到三分鐘，Oppa們一埋身玩遊戲，即令蝦頭防線失守，焫着蝦頭，滴晒汗兼扯晒蝦！

引「體」上升    姜天一持久力最......

第一個遊戲是考驗持久力的「公主抱」，Oppa們要抱起蝦頭引「體」上升，當啞鈴咁舉。「公主抱」對於體能爆表的Oppa們易過食生菜，並情深看着蝦頭溫馨提示：「你記住攬實我喎！」

蝦頭被Oppa輪住抱，矜持度當然跌到零，笑到頭髮亂了，亂到失去語言組織能力：「嘩！哈哈哈！咩料？起重機咩？機動遊戲呀？哈！」男的唞氣聲，加上女的高分貝吖聲，如果不看畫面，絕對18禁！

持久力最弱的是姜天一，捱到去27秒，只舉了蝦頭7下，宣布敗陣，狂唞大氣，但輸人唔輸陣，超有風度的說：「我唔係氣喘，不嬲都係咁樣呼吸嘅！其實蝦頭好slim，就好似雀仔飛落嚟嗰條羽毛咁輕。」持久力最勁的是李國榮，做足30秒並舉起蝦頭共15下，臂力驚人，更讚蝦頭「輕過我件衫」！

谷爆蝦頭：我畀咗第一次！

另一個遊戲，是考驗Oppa們的魅力，在30秒內施冧招，令蝦頭的心跳狂升，全程有心跳監測器量度。先禮後兵，李國榮先問會否介意有身體接觸，蝦頭即說：「雖然我唔隨便，但如果要求到，都會勉為其難嘅......」點知都未講完，李國榮即捉住蝦頭玉手，出招「直搗韓loong」，把蝦頭的手由他的胸口，高速往下掃，頭搖右尾擺，心口掃到大脾罅，途經「白鴿彎」，幾乎掃到重要部位！

本來心跳率有90下的蝦頭，不用30秒即爆升至115，齋用手都搞到心肝仔狂跳：「人一生有幾可摸到男人嘅大脾罅？除非拍拖！佢啲肌肉係一粒粒，我成世人未見過，我第一次就俾咗佢！」李國榮聞言即捉着她的手「驗明正身」，直接讓她摸其腹肌，並笑說：「但你唔似第一次喎！好熟手咁喎！」

至於姜天一見李國榮玩硬攻，即變招玩軟攻！一開始他先咬咬唇向蝦頭甜笑後，瞓地拱橋式上下挺腰，之後來一招「男人心一字馬」，臂腰前後蕩，盡展過人腰力腳力，即令蝦頭又掩眼又哈哈笑，最後突然從後一抱，嘩！點頂呀？

最後輪到正韓泉，加碼出招，自動波除衫半裸騷肌，嚇到蝦頭大叫：「你做咩呀？」正韓泉先展示背肌，捉着蝦頭雙手往自己的胸口「掃峰」後，一個反手從後抱着蝦頭。心跳由90跳到108的蝦頭怕怕醜的說：「好溫柔，畀到好照顧、好愛錫我嘅感覺，我想講我拍咁多次拖，香港男士都冇咁溫柔，Oppa講嘅甜言蜜語係我呢世人冇聽過。」

最後，蝦頭給Oppa們看五位女星水着照，選出他們心目中的女神，包括蝦頭、周秀娜、舒淇，而羅蘭和黃夏蕙年青時的水着照也在內。身為隊長的李國榮，二話不說選了蝦頭，非常識做！

輪做蝦頭男友

訪問期間，蝦頭問Oppa們的擇偶條件，李國榮說要跟他一樣愛做運動，正韓泉說條件是可和他一起看海享受美食，而姜天一要求心地善良。蝦頭即說自己合乎三人要求的條件，反問：「你哋會唔會爭我？」李國榮即列出「Oppa圍爐」的時間表，即場分配每人照顧蝦頭兩日，蝦頭說：「我好攰㗎大佬！畀返個星期日我休息啦！」

成功俘虜女士心，表演時百分百專業，發揮得淋漓盡至，是全靠演員們的毅力及自律。李國榮身為2013年韓國肌肉狂熱大賽冠軍、曾參加真人騷《體能之巔：百人大挑戰》，至今是唯一在韓國保持3%體脂的健身狂人。李國榮說，作為專業演員要自律及保持謙虛，包括避免吸煙或飲酒、進行其他活動時要避免受傷，對粉絲要保持禮貌。

「為保持演出最佳狀態，演員要嚴格自我管理，包括進行負重訓練及健身等，時刻保持完美體態，並保持體能以應付演出；要注重護膚，保持最好嘅外表。同時要抱感恩嘅心，要感謝時刻支持自己嘅人，更要做好自己樹立榜樣。」李國榮說。

高度自律持感恩心

李國榮續說，《Wild Wild》給他的意義非凡，因給他機會讓韓國及海外的觀眾認識他，而每一次表演更令他增強自信。「如果有機會，都想有其他嘗試如拍劇、拍電影或綜藝節目，但無論如何，我始終以《Wild Wild》為本，因為能夠展示我最好一面。（影寫真？）隨時ready！我覺得我已經準備好，我嘅身材亦都處於最佳狀態。」

問到身為女士甜心的李國榮，有否招來其他男士嫉妒時，他笑言有時都會令一些大隻男不是味兒：「雖然佢哋都係大隻同靚仔，但都會妒忌，而女士身邊嘅男士，都會投以嫉妒嘅目光。」

身為隊長的李國榮，對於拍擋姜天一及正韓泉也高度評價，三人的感情更是相當不錯：「喺咁多演員之中，我哋三個係特別close，成日會一齊去健身或食飯，相處時間好多，姜天一成日請我哋飲咖啡，正韓泉雖然年紀最細，但成日請食飯，如果有日我事業更上一層，我會送間屋畀佢哋！」Wow！

「喺姜天一身上，學到更多關於舞技同台風，我認為在台上表演時，一定要知道點樣去掌握觀眾嘅反應，令佢哋全情投入。而性格好動活躍嘅正韓泉，一行出嚟就好sharp，因為佢好有正能量同埋感染力，帶咗一股積極陽光嘅力量畀觀眾。即使平時相處，佢都好識得搞氣氛，令台前幕後都好舒服。」李國榮說。

正韓泉：有粉絲睇咗300次！

在仁濟大學運動系畢業的正韓泉，是韓國Sports Model大賽冠軍，曾參加真人騷《Mr.Trot》、《體能之巔：百人大挑戰》。2021年加入《Wild Wild》的他，說演出以來最大收獲，就是愛護他的粉絲！「每次演出都全力以赴，因感受到粉絲畀我嘅愛同幸福，粉絲係我不斷努力工作嘅原動力，呢部音樂劇係我人生第一個舞台演出，令我自信增加。作為 《Wild Wild》一員，我同時會繼續演出同埋模特兒嘅工作，其實我對音樂都充滿熱情，所以都想有相關表演。」

他說雖演出多年，駕輕就熟，但依然要努力排練。「我哋成日會排練，亦都掌握好多執生技巧，但總會有突發事情，有次有演員着牛仔褲跳舞時，跳跳吓爆軚，呢幕喺網上都有瘋傳。總之，任何唔應該做嘅嘢，都唔好做，因為唔想辜負粉絲嘅期望，我好珍惜呢個舞台。粉絲好熱情同支持，有一名粉絲更足足睇咗呢部劇300次！怕男士妒忌？我反而希望男士們更喜歡同欣賞我，其實好多男士都會重視身材管理。」至於會否拍寫真，他說的確正在製作中，更說希望有機會在香港出道。

姜天一只享受舞台無意當名人

至於青靚白淨的姜天一，早年在慶熙大學主修現代舞，更因參加戀綜《粉紅謊言》令人氣勁升，他說《Wild Wild》帶給他的更加多，更說沒有刻意計劃入娛樂圈。「由以前藉藉無名，到依家咁受歡迎，心態係加強咗。一直以嚟，我冇試圖刻意去做名人，我只係喜歡跳舞同表演，喺舞台上發揮才華。我期待除咗喺亞洲演出外，可以有機會喺歐洲演出。」

說到作為《Wild Wild》的演員，姜天一說除了要自我管理，保持最好狀態，心態也重要。「我更在乎嘅，係自己嘅性格態度，同埋要尊重觀眾，因為表演係令我同觀眾有一個更直接嘅接觸。」作為靚仔，當然成為男人公敵，他笑說：「冇喎，我未見過有男人妒忌我，可能係表面啦！個心又唔係咁諗啦！」

令姜天一最珍惜的，是和李國榮和正韓泉相處的時光，認為是最難忘的青春回憶。他說：「我認為佢哋好獨特，好有個性同埋好有passion，同佢哋相處係好難忘寶貴，會記住點點滴滴，將來回頭諗番或話當年時，都會係好sweet嘅事。」

《Wild Wild》知多啲！

由BLACK BRAILLE主辦的《Wild Wild 》香港站即將在5月11至12日，於亞博上演四場，其中三場專為女士而設。

音樂劇《Wild Wild》由9位Oppa演出，包括李國榮、姜天一、正韓泉、柳志翰、金士烘、金東熙、李熙中、韓鎭煜、朴道鏡，並由知名韓國藝術總監崔永進及編舞家鄭石奉監製，2021年10月在韓國首爾首次公演，成為韓國睇騷新熱潮，更吸引成千上萬的旅客。

音樂劇以滿足女性浪漫為主題，把當代舞蹈和性感肌男結合，完全刺激官能，曾被評為「年度最佳新秀」，由於在韓國當地只准19歲以上的女士入場，隨時更被選中跟Oppa互動，故被指為「19禁猛男騷」外，熱潮席捲亞洲，分別到台灣及澳門等地演出。