發佈時間：18:07 2025-12-08
《中年好聲音4》第3集《決戰大灣區》昨晚（7日）播出，再誕生兩名5燈選手，分別為雷小雷《唯一》及朱珠《如果沒有你》及，男女各一位同屬「靚聲王」。谷婭溦聽到雷小雷一開聲，即發出驚嘆聲及率先撳燈，她坦言要送他「恰到好處」4個字。值得一提的是，同場還出現一位唱作型參賽者黃藝輝，並以原創歌參賽，但最後只得3燈成績，要進入等候區等復活機會。
雷小雷一開聲谷婭溦激動撳燈
昨晚的參賽者中，35歲網絡音樂主播雷小雷，憑藉超強唱功贏盡好評，一開聲已令評審之一的谷婭溦發出驚嘆聲，並率先撳燈，就連「手緊王」周國豐也讚不絕口，他直言：「今季暫時睇咗幾個賽區，都有好多把靚聲，你把靚聲唔係誇張，我會形容接近Hi-fi發燒，你把聲好靚喎！因為佢可能係音樂主播，佢控制聲音控制得好好。」
谷婭溦激動表示：「Sorry，我好激動，我好High啊真係！因為我想用4個字送畀你『恰到好處』，你嗰種舒服嘅感覺係由第一句開始令到我哋同你一齊入到首歌入邊。」張佳添續稱：「連續聽咗兩把靚聲好開心，一個女一個男，你唔Show off技巧，好自然將首歌送咗俾我哋。」肥媽則說：「唱得唔需要力咁，好瀟灑，好開心聽到你唱呢首歌，揀啱歌同埋好適合你。」最終他橫掃5燈佳績直接晉級。
黃藝輝獻唱原創歌獲海兒稱讚
昨晚還出現了一位唱作型參賽者，他就是現年39歲的音樂製作人黃藝輝，他獻唱原創歌曲《凌晨香港》。黃藝輝唱出第一句時，已打動了海兒，海兒坦言：「我係好鍾意你把聲，因為好坦誠好真誠嘅聲嚟嘅。」更透露自己原來經常夜瞓：「我都好多謝你寫咗首歌畀凌晨嘅香港，因為自己都好夜瞓，I think is a good vibe！」
周國豐續說：「你有你嘅態度，尤其係你嘅創作當中，對於表演者嚟講，嗰個態度係好緊要先至會令人記得。」而谷婭溦則表示：「你把聲真係幾好，但你一到後面嘅時候越嚟越唔穩陣，如果你後面冇爆得咁犀利，可能會好啲。」最後奪得3燈成績，要進入等候區等復活機會。
延伸內容：中年好聲音4丨谷婭溦做評審變小辣椒 教選手咬字被質疑 音樂高材生背景曝光
延伸內容：中年好聲音4︱ 袁帥獲張佳添力讚「最5燈嗰個5燈」 曾為全球華人新秀歌唱大賽前5名
延伸內容：中年好聲音4︱ 海兒激讚前準歌手鄭家聲真誠有深度 「學霸級林峯」基本功夠好
《東周網》訪談系列節目《星桄伴我心》12月重磅嘉賓：
即睇：「海馬」老闆鄔友正因翁嘉穗重病痛哭 妙論太太係老虎乸 徙置區小子創富路
立即追蹤《東周刊》全新WhatsApp頻道，緊貼全城熱話、突發猛料、獨家消息！
