發佈時間：18:00 2025-12-01
很多人以為海馬床褥老闆鄔友正是富二代，實情他住過木屋、徙置區、公屋，靠自己白手興家，更因為內地太多冒牌假貨搶生意，而被逼改行高調作風，玩小紅書做網紅，再參加《中年好聲音4》海選。
工作上，員工要聽他發施號令；回到家，他就讓太太翁嘉穗話晒事，「我形容佢係老虎乸，即係抬舉佢、尊重佢咁解。好似有啲老婆會被人打、被人鬧，如果你係老虎乸就調番轉，咁喺屋企大晒，唔好咩？」
他更直認是愛妻號，「好多年前已經俾咗一張冇簽帳限額嘅信用卡太太，任佢買鍾意嘅嘢。」
訪問這天，71歲的他腰肢挺直，和翁嘉穗穿情侶裝到場，恩愛到暈。
患難見真情
結婚26年，早有默契，難怪鄔友正毫不害怕跪玻璃，在太太翁嘉穗面前，說出對「老虎乸」的自我一套解讀。他指二人相處之道，不外乎退一步海闊天空。
「尤其我咁嘅年紀，過一日少一日，時間寶貴，嘥一分鐘內耗都唔值得。初期我哋經常嗌交，後來覺得好無謂，我咪改脾氣讓下佢。」
他曾經說過「緣分天注定」，欣賞太太善解人意，所以他將自己的結婚大計推前了10年，45歲就封盤。
「細個冇諗過將來要娶個港姐冠軍太太，只係覺得係靚女就得啦。太太好善解人意，同我目標一致，想我事業好啲，賺多啲錢。佢從來唔會投訴我掛住返工唔理佢，佢鍾意着靚衫、拎靚手袋好正常，係有幾次簽帳銀碼大咗啲啫。」
被老公兜個圈讚靚，翁嘉穗怎會不受落？她回憶二人當年第一次在港姐贊助商的宴會上見面，「我係97年港姐嘛！嗰時佢好得意咁笑住望實我哋，我就開始留意佢，之後約會食飯，覺得佢成熟穩重，拍拖幾個月就結婚喇。」
夫妻相處，總有共患難的感動時刻。前年翁嘉穗的甲狀腺出事，要做切除手術，當時鄔友正身在深圳公幹，他說：「突然收到消息，有啲慌張、擔心，即刻趕返香港陪佢，同佢睇醫生。如果佢受刺激，係有機會復發㗎！但我覺得心情好，有寄託就會穩定，𠵱家好珍惜每一刻相處時光。」
雖然沒有說出口，但他曾在小紅書自爆一生人沒有哭過，唯獨今次為太太流下男兒淚，可見他好重視太太。
捐床褥賑災
沒有含着金鎖匙出世，童年的鄔友正，住過大磡村木屋，後來搬去紅磡徙置區，每日拿着面盆輪候公共廁所。如是者過了幾年，終於獲安排上樓，遷到真善美邨，每日上落7樓的住所，練好腳骨力。
「童年性格問題，令我唔開心。我好孤僻、脾氣大、硬頸，成日同家人因為好小事而嘈交，所以中學畢業後，就去咗美國讀書，如果童年性格好似𠵱家咁就好。真正開始改變性格，我諗應該係結婚後，冇得避吖嘛！控制唔到別人，唯有改變自己。」可見一個好妻子和家庭，足以改變一個男人的性格和命運。
鄔友正自小有個企業夢，但大學畢業返港，打了兩年工，發覺賺錢好難，後來他靈機一觸，眼見全世界只有軟床褥，於是在1986年研製出香港首張「極硬床褥」，翌年創立海馬牌，大受歡迎。「本來同個朋友夾份創業，後來佢退出，否則我𠵱家只會佔一半股份。」
很多人有疑問，一張床褥至少睡10年8年，如何不斷有生意？他笑說：「當搬出來住、結婚等原因，客人就會換床褥，通常8年換一次。我去旅行都會帶住海馬枕頭，否則瞓唔着。」
生意做得有聲有色，奈何在內地有太多冒牌出現，訴諸法律都解決不了。「內地海馬市場有10%係我哋，90%係假，舊年法官重罰一間賠150萬，一間58萬，初初好開心以為得米，點知可能太好賺，假海馬當交租，改頭換面又開過，所以我玩小紅書，整紙板公仔，等外界認識我先係真。」
取諸社會，用諸社會。大埔宏福苑上周三（26日）發生大火，他即捐出200張床褥到臨時庇護中心幫助災民，以解燃眉之急。
目標開個唱
鄔友正早前因參加《中年好聲音4》海選，成為熱話。當日他撐着枴杖到場，可惜表現失準被叮出局。賽後檢討，他只怪自己參賽前一天受不起誘惑，吃了很多魚生，晚上肚屙，患上腸胃炎。「隻腳趷下趷下，係因為有一日喺屋企絆倒骨折。嗰日海選，我個肚嗱住嗱住痛，連拍子都跟唔到，如果100%水準去唱，有機會入到99強㗎！我會考慮練多一年再參賽。」
塞翁失馬，焉知非福，雖然鄔友正輸了比賽，但汪明荃邀請他擔任下月的演唱會嘉賓。於是他再跟歌唱老師高晨維學唱歌3個月，乖乖聽話戒口養聲，巧合地，跟炎明熹同一歌唱老師，成為她的師弟。
「到時我打算唱3首歌，包括〈笑看風雲〉、〈浪子心聲〉同〈萬水千山總是情〉，希望可以翻盤啦！好羨慕炎明熹才20歲，歌已經唱得好好聽！我會努力練習，準備將來自資喺東莞開第一場個人演唱會。」
眼前的鄔友正身形弗爆，詠春、國標舞、唱歌、一字馬瓣瓣掂，生活多姿多采，驗身報告更是靚仔到不得了，沒有「三高」。問他是甚麼驅使他注重養生？
「我細個成日病，所以一直都好注重健康，唔煙唔酒。另外，唔開心、發脾氣對身體最差，做人要樂觀。飲食方面，三分一時間亂食，三分二時間食得好清，平衡番，旅行就唔理，瘋狂食，之後先減。」
忙碌了大半生，他表示可能退下做顧問，讓大仔謨雲接手公司，「佢話將來最大嘅夢想係做海馬，叫我將盤生意交俾佢。」
有25歲大仔做接班人，他和太太翁嘉穗大可放手，閒時帶10歲細仔謨風踢足球，好好享受人生。
