更新時間：14:40 2025-12-08
發佈時間：14:40 2025-12-08
發佈時間：14:40 2025-12-08
生仔要考牌，子女可以令家庭更圓滿，亦可以係計時炸彈，令兩公婆感情破裂。
《去死吧，我的愛》（Die, My Love）將呢個殘酷真相拍攝出嚟。奧斯卡影后珍妮花羅倫斯（Jennifer Lawrence），一心諗住同羅拔柏迪臣（Robert Pattinson）搬去鄉郊，放慢腳步過二人世界，點知突然要做媽媽，育兒嘅壓力、工作嘅瓶頸、老公嘅疏離，令佢逐步崩潰。
咁啱得咁橋，拍攝時珍妮花陀住4、5個月身孕，「荷爾蒙變化幫咗我好多，等我可以好快入戲。」
夢幻組合
荷里活大導演馬田史高西斯（Martin Scorsese），早幾年睇到《去死吧，我的愛》嘅原著小說，個腦即刻叮一聲，諗到要搵人演繹呢個壓抑又瘋狂嘅女主角，非珍妮花羅倫斯莫屬，於是推薦俾珍妮花嘅製作公司。
挑戰性咁大，珍妮花即刻答應演出，同馬田齊齊出任監製之餘，仲親自邀請《吸血新世紀》（Twilight）系列男星羅拔柏迪臣飾演男主角，蓮妮南斯（Lynne Ramsay）執導。呢個組合，夠晒夢幻。
珍妮花喺片中時而抑鬱，時而狂躁，飲酒、舔玻璃、對狗狂吠、自殘乜都做齊，行為失控，不過導演蓮妮就表明同產後抑鬱冇關。
裸露上陣
今次係珍妮花同羅拔首次合演夫婦，原來二人早有淵源，珍妮花話：「我曾經試鏡演《吸血新世紀》女主角Bella一角，但當時佢哋直接拒絕我，甚至連複試機會都冇。」雖然冇得同「吸血鬼Edward」羅拔談情，但命運另有安排，佢之後憑《飢餓遊戲》（Hunger Games）大放異彩。
講番《去死吧》先。開工第一日，珍妮花被要求裸露上陣，難佢唔到；而羅拔就被一場即興加插嘅跳舞戲考起，「導演同珍妮花都識跳舞，佢哋覺得好易，話跟住音樂郁就係，唔使排練，搞到我『精神崩潰』，跳到成身大汗呀！」
上映日期：12月4日
《東周網》訪談系列節目《星桄伴我心》12月重磅嘉賓：
即睇：「海馬」老闆鄔友正因翁嘉穗重病痛哭 妙論太太係老虎乸 徙置區小子創富路
立即追蹤《東周刊》全新WhatsApp頻道，緊貼全城熱話、突發猛料、獨家消息！
最Hit
