發佈時間：18:30 2025-11-13
《中年好聲音3》參賽者占士丁丁（Dan James）近日推出首支廣東派台作品《我的格言》。這歌由張家誠與丁丁共同作曲，並林寶填寫廣東歌詞，英文詞部分則由丁丁親自創作。為隆重其事，丁丁日前舉行MV首播禮，吸引近百粉絲到場支持，更獲圈內外好友現身力撐，包括吳大強、李佳、陳智燊、羅逸軒及阮慧珊等，場面熱鬧又溫馨。
首播禮與粉絲真情互動
首播禮上，占士丁丁以流利英文與廣東話向嘉賓及粉絲致謝，並與眾人一同睇MV首映。其後他親自向每位到場者獻花表達感激，更收到粉絲團「丁丁 Family」親手製作的巨型心意卡。丁丁動容表示：「好感激大家咁真心接納我，真係當我家人一樣，照顧埋我起居飲食，譬如我病咗會幫我買藥，我聲沙又會買蜜糖畀我；換季又會幫我準備衫褲鞋襪，仲成日買地道美食畀我，好榮幸得到愛錫，所以一定要一齊分享呢份喜悅。」
透過新歌多謝香港人支持
占士丁丁將《我的格言》形容為致香港的情書，透露自來港發展後，一直得到滿滿的愛：「我嚟到香港由Busking開始，一直得到好多香港人嘅支持同鼓勵，話我唱歌好聽，到我參加咗《中年好聲音3》，又成日同我講：『丁丁我支持你！』，令我更有動力用幾日學一首中文歌，所以我有機會出自己嘅歌，好想透過《我的格言》多謝番香港人。」
努力鑽研廣東話完成錄音
談及首支廣東歌面世，占士丁丁坦言是夢想成真，心情格外振奮，「我由細到大都想做歌手推出自己嘅歌，10幾歲開始周圍唱歌，一直以為只係一個夢想，估唔到喺香港可以實現到。」雖然他的廣東話是「有限公司」，錄音時有一定難度，但他堅持鑽研每個字的含義以投入感情，加上在監製張家誠耐心指導下，經過幾日的努力終於完成作品。
特別鳴謝郭偉亮阮慧珊幫忙
《我的格言》MV融入了占士丁丁在港生活的真實寫照，他解釋道：「經常喺街見到啲婆婆、公公、叔叔、或者學生哥同我打氣，就算佢哋有啲唔識英文，都會拍吓我膊頭或者畀個like同我加油，我想拍出嚟話俾大家聽我係感受得到，多謝大家。」他特邀Eric Kwok（郭偉亮）及阮慧珊客串演出，並藉此答謝二人：「喺我失意時，Eric畀咗好多鼓勵我，仲同我合作DJ組合『HO HO ONE』；而阮阮喺比賽時已經成日幫我，當然仲有我啲粉絲嚟客串，多謝大家咁幫手！」
延伸內容：《中年好聲音3》占士丁丁人生多起跌 曾紅爆內地夜場酒吧 低潮時做地盤工、帶貨
延伸內容：中年好聲音3之決戰前夕｜占士丁丁坦言想贏
