更新時間：17:20 2025-10-11
發佈時間：17:20 2025-10-11
發佈時間：17:20 2025-10-11
超前部署下，超強颱風樺加沙上周對香港未有造成嚴重破壞，香港人可以繼續做黎生，第二日如常返工。韓國影帝李炳憲嘅訴求一樣，喺新片《選擇有罪》（No Other Choice）入面，佢突然俾老闆炒魷魚，霎時間，一家四口嘅生活質素直插谷底，連安樂窩都隨時不保，「我要返工！」就成為佢最大嘅心願，仲癲到向求職競爭對手大開殺戒⋯⋯導演係拍過經典復仇片《原罪犯》嘅朴贊郁，而女主角就係產後復出嘅孫藝珍。鐵三角陣容，可一不可再。
延伸內容：《選擇有罪》（No Other Choice）新片介紹｜李炳憲、孫藝珍、朴熹洵、李星民、廉惠蘭、車勝元主演，朴贊郁執導
《選擇有罪》改編自美國懸疑驚慄小說
《選擇有罪》改編自美國懸疑驚慄小說《The Ax》，以荒誕又寫實嘅故事，批判職場嘅殘酷無情。3年前憑《分手的決心》捧走康城影展最佳導演殊榮嘅朴贊郁，透露籌備開拍超過17年，原本想喺荷李活拍攝，但最後錢作怪而擱置。好彩現時版本一啲都唔失禮，有份入圍今屆威尼斯影展，又獲選為第30屆釜山國際電影節嘅開幕電影。
李炳憲新片孖產後復出孫藝珍跳騎呢舞
飾演夫婦嘅李炳憲同孫藝珍，私底下相識多年，片中兩人有跳舞鏡頭，憲哥話：「未到埋位前一刻，我都唔知要跳啲咩舞步，搞到舞姿有啲騎呢。如果觀眾入場人次突破千萬，我應承大家，會現身戲院謝票一星期。」珍妹就笑佢開出嘅條件唔夠吸引，「應該要着番嗰啲衫，去首爾最多人嘅明洞跳舞先得。」
華麗演員陣容仲有車勝元、朴熹洵、李聖旻，當中有人同憲哥爭飯碗，有人就食花生想睇憲哥落難，結果統統成為獵物。有指片中仲有彩蛋，柳演錫會粉墨登場飾演牙醫。
珍妹為谷票房大談老公玄彬婚姻生活
為咗催谷票房，珍妹仲公開大談佢同《愛的迫降》男星玄彬嘅婚姻生活。佢話老公通常要食囝囝嘅餸尾，「有一次，我搵佢幫手對《選擇有罪》劇本，點知佢敷衍了事，俾我鬧要認真啲囉！」咁樣打情罵俏法，得唔得㗎？
《東周網》訪談系列節目《星桄伴我心》10月重磅嘉賓：
即睇：湯令山失戀情歌點擊破1500萬 坦認喊住唱 揭Wyman教做人智慧 爆生得唔高謎團 曾擔心生計做某件事
立即追蹤《東周刊》全新WhatsApp頻道，緊貼全城熱話、突發猛料、獨家消息！
最Hit
