發佈時間：12:00 2025-10-07
43歲的黃翠如與48歲的蕭正楠結婚7年，曾經歷流產之痛，之後大減工作養好身體，直到去年終於造人成功，兒子「蕭哈哈」於今年3月出世，一家三口相當幸福。
雖然翠如現時有仔萬事足，但未有打算退出幕前。因為她心痛老公要獨力撐起頭家，近日積極搵曝光機會，四圍放聲氣𢱑撈，揚言誓不做湊仔師奶。
蕭正楠落力吸金搵奶粉錢
蕭正楠自成為一家之主，肩負起「養妻活兒」的重責，經常周圍飛落力吸金，繼8月孖黎耀祥及曹永廉飛澳洲拍攝全新旅遊節目《他們的澳洲駕期》後，上月又到馬來西亞登台，更不時中港兩邊走出席活動，工作排到密密麻麻；而向來是廿四孝老公的他，一有空檔就會陪伴老婆和兒子，完全冇得休息，捱到五勞七傷。
蕭正楠的友人透露：「其實蕭正楠好大壓力，雖然翠如唔係大使，但家庭開支都好大，加上自己都接近50歲，個仔都只係啱啱出世，佢都擔心唔知自己仲可以做到幾多年，所以都搏晒命好努力吸金，逢job 必接，永不推job。」
翠如早年曾經歷流產，經過多年努力終趕及尾班車，如願做媽媽，實在難得。早前，她出席活動直言現時很享受做媽媽，並笑言自誕下「蕭哈哈」後，幾乎長期足不出戶，亦透露自己已經好耐冇化妝，經常處於一個湊仔戰鬥格，不修邊幅，更自嘲在家的造型非常「醜樣烏Wer」。
黃翠如心急復出 分擔老公
當大家都以為翠如會減產退隱幕前，專心湊仔，原來她並非甘願做全職媽媽，仍然嚮往幕前帶給她的滿足感，同時亦心痛蕭正楠要獨力承擔全家開支，所以她誕下「蕭哈哈」後都非常心急復出。今年5月，她便孖洪永城出席品牌活動，最近亦積極經營社交網，不時拍片分享湊仔日常，甚至有網民指她效法陳凱琳，鋪路做YouTuber 。最近，翠如更與蕭正楠夫妻檔拍攝TVB全新綜藝節目《家傳之保》，節目以傳承為主題，這亦是翠如產子後首次拍節目，到街市親身體驗父親當年在海鮮檔工作的環境，她更自爆要積極減肥，尚有6kg要搣甩。
友人續說：「翠如的確非常享受做媽媽，每次離開兒子出去一陣都會好掛住，但同時佢都心痛蕭正楠要獨力孭起頭家，所以想回歸幕前，幫老公分擔一下；加上翠如曾經患過情緒病，佢都唔想長期屈喺屋企做黃臉婆，有適量嘅社交圈子同埋工作，平衡返生活節奏，所以佢近排都周圍放聲氣，講明唔係打算做全職媽媽，希望有更多登台、拍廣告機會，keep住人氣。」另外，有傳翠如與蕭正楠將會現身下月推出、愛奇藝的旅行真人秀節目《恰好去遠方2》。
延伸內容 : 蕭正楠 黃翠如兒子「蕭哈哈」百日宴 曬一家三口相 眼仔睩睩超可愛
兩公婆睇音樂劇減壓
縱使翠如和蕭正楠忙於要吸金，但都不忘抽空享受一下二人世界。日前，他倆出席TVB 《家傳之保》的宣傳活動後，未有立即回家湊仔，反而去拍拖欣賞由陳友、黎瑞恩、張與辰及趙浚承主演的《娛樂圈夫人》音樂劇，順便放鬆減壓。
當日，兩人駕車直駛去荃灣一個商場，為免被途人認出，他們泊車後特意去後座搵口罩，之後再去撐枱腳。期間，他們毫無架子，相當貼地地幫襯平民越南餐廳食河粉，可能慣咗湊仔節奏，兩公婆極速25分鐘就醫飽肚埋單走人；跟着再急急腳去了一間泡芙專門店，左揀右揀後買了一大袋泡芙，原來是買給音樂劇台前幕後工作人員。兩公婆咁識做，對翠如𢱑撈，自然大大加分。
