發佈時間：10:00 2025-10-03
在打風的下午，約了湯鎮業的兒子、細孖湯君耀（Chris）做訪問。他一手接過女助手的大袋衣物，毫無架子。
2017年入行的他，做過模特兒、拍過戲，上月轉換舞台，做樂壇新人推出歌曲〈Friendship Only〉。
「爹哋仲未知我做歌手㗎！諗住俾個驚喜佢。我第一次入錄音室錄歌，聽見自己把聲嘅瑕疵被放大好多倍，真係認唔到，幾大打擊，好彩監製話正常，去咗幾次就適應到。」
香港樂壇之中，他最鍾意陳奕迅，「去唱K，成版都係點佢啲歌，〈與我常在〉、〈浮誇〉等等，我都唱得OK㗎！」
聽見他這樣說，真有衝動想即刻點唱。
唱到90歲
30歲的湯君耀，是湯鎮業和前妻姜坤的孻仔，對上有一個姐姐湯愛嘉和孖生哥哥湯君慈。8年前拍電影《大師兄》入行，父母放手任他自由摸索，丁點演戲貼士都沒有。今次他踩過界做歌手，爸爸仍未知情，媽媽就開心得四圍跟朋友分享消息。
「由細到大，我比較鍾意運動，有加入籃球隊。雖然唱歌一直都係興趣，但冇諗過做歌手，直至年幾前，公司問我有冇興趣做其他嘢，咪趁後生試下囉。」
湯君耀斷斷續續跟過戴蘊蔚學唱歌，他首支派台歌〈Friendship Only〉講述一對曖昧男女錯失發展機會的無奈，問他可是其親身經歷？他笑笑口否認：「唔係呀！係身邊朋友嘅故仔。收到demo後，考慮好多因素而決定用呢個題材。」
MV請來上山詩鈉愛女Hilary Fan和港隊足球前鋒安永佳拍攝，「我同Hilary好似兄弟咁friend，佢好有義氣，搵佢幫手，即刻應承。我爹哋同佢媽咪識咗好多年，但我哋只係識咗6、7年，喺出席活動時識嘅。」
做歌手，養聲好緊要。他坦言好難戒食辣，但會盡量食得健康。
「我本身鼻敏感，對唱歌有影響，監製就教我用鼻壺洗鼻去改善。攞獎方面順其自然啦，我想唱到8、90歲，唱到把聲唱唔到為止。」
星二代光環
有個明星爸爸湯鎮業，以為湯君耀童年時，會經常見到劉德華、梁朝偉等「五虎將」uncle到屋企食飯？他即刻搖頭，指爸爸很少在港，就算有星級uncle到訪，可能他太細個，已經忘記了。
「爹哋長時間喺內地工作，我哋聚少離多，佢每次返嚟，我哋都好珍惜。我最崇拜爹哋嘅地方係佢好有責任感、好重感情，對身邊人好好，呢樣嘢好值得學習。佢有8兄弟姊妹，每次返港都會第一時間約晒親戚朋友食飯，家庭觀念好重，堂家姐夫婦湯洛雯同馬國明就通常新年聚會時見到。」
在他的心目中，爸爸並非嚴父，但小朋友難免頑皮，要教訓一下，而湯家就實行集體問責制，無論他或哥哥做錯，另一個都要受罰。
「細個嗰陣，成績差，同阿哥又比較曳，爹哋咪成日打我哋囉！小學時，佢成日罰我哋企同抆耳仔，叫我哋喺廳由朝企到晚，面壁思過，跟住佢去瞓覺囉，好搞笑。家姐會做和事佬幫手求情，不過爹哋可能係潮州人，唔會一樣咁罰家姐，佢覺得女要錫，仔要捱，做佢個女會sweet啲。」
頂着「星二代」的光環，他自言對於被稱呼做「湯鎮業個仔」已感到麻木，不會介意，他說：「反而好處多，起碼有爹哋做目標，有方向跟住。」
想組男Twins
在湯君耀的成長路上，身邊總有孖生哥哥湯君慈，兩兄弟由出國讀書，到畢業後返港加入娛樂圈，都拍住上。
「我哋爭2分鐘出世，有得揀梗係做細佬好啲啦，比較受保護，有咩做錯，都可以用『我係細佬』做擋箭牌，好似以前返學遲到都可以賴阿哥，哈哈！」
有說孖生兄弟會心有靈犀，他笑說兩兄弟的口味差不多，「一齊去食飯，永遠都係叫同一樣嘢，大家好鍾意食雞扒煎蛋飯，又鍾意做運動，會一齊病，傷風發燒。」
性格方面，兩兄弟大不同。湯君耀自言性格隨和，冇乜所謂，比較似爹哋，但哥哥就似媽咪，有原則和硬頸。現時二人搬出來同住，他感受到哥哥的氣場，不敢踩中其「地雷位」。
「阿哥愛整潔，會多啲做家務同執屋，我就唔敢整亂我間房以外嘅地方，否則阿哥會嬲！試過用完隻碗冇即刻洗，阿哥頂唔順，洗到乒鈴嘭唥俾聲我聽。」他苦笑道。
提到愛情觀，他指哥哥喜歡有個人空間多一點，「阿哥係唔理女朋友啲人，我就鍾意黐多啲，比較細心。佢都鍾意唱歌㗎！如果有機會，可以組隊男版Twins闖樂壇。」
至於哪一個唱歌好聽啲？他不加思索地舉手自認。事實如何並不重要，我看見的，是手足情深。
相關內容 : 湯鎮業嫁女 前妻姜坤紅色大露背長裙褲現身 氣質出晒嚟!
《東周網》訪談系列節目《星桄伴我心》9月重磅嘉賓：
即睇：羅毓儀淚眼訴說4段情 冧數林俊其出「七連招」追求 甜蜜剖白：我想出年結婚！
即睇：鄭子誠感動細訴與劉倩怡「手指公」情緣 爆因黃夏蕙變奸 因陳百強變成偷渡客
立即追蹤《東周刊》全新WhatsApp頻道，緊貼全城熱話、突發猛料、獨家消息！
