發佈時間：16:41 2025-02-13
今個星期，中西情人節輪流殺到，有情人奉旨放閃。有「珠寶界女神」之稱的珠寶設計師莊莎娜（Sarah），就趁單身前的最後一個情人節，與金融才俊未婚夫Jason Lam合力炮製心心蛋糕，甜蜜到爆。Sarah在去年「5.20」（我愛你）這個特別日子，宣布答應男友的求婚，原來她已擇好吉日，準備今年6月做新娘，「Big day喺6月7日，我哋會喺尖沙咀瑰麗酒店擺3、40圍酒。」婚禮花費多少？她望一望Jason，Jason即有默契代答：「應該有7位數字。」逾百萬的婚禮，換來一生人一次的難忘回憶。未來日子，兩口子必定幸福滿滿。
夾計驚喜求婚
34歲的Sarah去年受訪時，曾透露已認定同齡的金融才俊男友Jason是Mr. Right，計劃兩年內披嫁衣。今次再見面，她已經變成準新娘，更拖着Jason前來，夾手夾腳整情人節蛋糕。期間笑聲不斷，滿滿的粉紅泡泡。
今年是二人共度的第3個情人節，去年情人節，大懵的Sarah訂了機票去滑雪，旅行完返港，獲一向不懂浪漫的直男Jason捧着鮮花接機，再下廚煮pasta給她吃。Sarah甜絲絲地說：「嗰次應該係佢做過比較sweet嘅嘢。」
冧豬豬的事，怎少得去年5月求婚一幕？Jason透露當日夾埋Sarah的胞姊莊菲娜，隱瞞Sarah和其他家人，預訂了K11 MUSEA一個私人場地，上演驚喜求婚。Jason說：「藉口係食飯慶祝Sarah姨甥仔嘅生日，其實我同佢姨甥仔生日只相差一日，仲記得嗰個weekend係母親節添！佢家姐好好，晏晝捉咗Sarah去按摩，咁我就去場地做準備。」
Sarah一到達餐廳，就見到Jason企在對面，有一塊板寫住「Will you marry me？」她笑說：「我一開始未望到啲字，唔知佢做緊乜，跟住先發現佢已經講咗一段嘢，我咪話：『Sorry，你可唔可以講多次？太surprise，聽唔到。』」
她定過神後，一口答應求婚。問Jason可有開心到振臂高呼？Jason說：「都幾開心。」Sarah聽見即撒嬌：「幾咋？」
頭痕賓客名單
回想起去年的求婚，Sarah歷歷在目，指Jason做齊「求婚3寶」，準備了鑽戒、鮮花，又單膝下跪作出愛的宣言。「隻鑽戒3、4卡重，其實係我好多年前嘅設計，當時我同家姐講過，以後結婚，我鍾意呢款。Jason改咗少少中間主石嘅形狀，我本身嘅設計係圓形 。」
做足功課，抵Jason抱得美人歸。他笑言求婚時緊張到心跳加速，原以為可以講2分幾鐘的speech，不消半分鐘便講完，「未來外父、外母見我得米，叮囑我要對Sarah有耐性同愛心。」
二人的婚禮定於今年6月、豪花逾百萬在酒店筵開約40席，Sarah表示本身喜歡簡單的小型婚禮，但後來發現太多長輩要邀請。
「賓客名單最難搞，好多親戚和朋友在國內和海外，要提早講定。本來想用電子請帖，但要遷就長輩，唯有改用傳統的實體請帖。我唔想擺多一日酒，好麻煩！連埋婚紗，我暫定在婚宴上穿3套衫。我哋比較鍾意之後的after party，主要請一班朋友，應該比較casual、好玩啲，到時會請埋DJ搞氣氛。」
婚禮籌備得七七八八，婚紗相亦於去年底在上海拍攝好，前後影了12小時便大功告成。Sarah指婚後的千呎愛巢剛開始裝修：「仲設計緊，細節嘢我跟多啲。」
初見以為是玩家
由相識、相知、相戀，到快將踏入人生新階段，Sarah笑說6年前在媒人、18年港姐季軍丁子田的生日派對上，對Jason的感覺麻麻，「第一眼見到佢，以為佢係player（玩家），識咗之後當然知唔係啦！覺得佢好好。」
聽見Sarah最初這樣看自己，Jason一臉無奈，指第一印象覺得Sarah有點生人勿近，熟絡後才發現大家很夾，互相吸引。「我最鍾意佢好守時，因為我係一個非常守時嘅人，我覺得唔係個個女仔都做到，佢做嘢真係好快，化妝超快。」Sarah聞言即刻撒嬌：「呢個好似唔係好吸引，哈哈！」
Jason補充：「呢樣嘢好special㗎！以一個咁靚嘅女仔嚟講，真係好快，15分鐘就搞掂。佢又有愛心，對我隻貓好好，佢之前唔鍾意貓，𠵱家隻貓黐佢多過黐我。」
Sarah最欣賞Jason好識照顧人，好有責任心，例如有次一班朋友去北海道旅行，他寧願犧牲自己，滴酒不沾而做司機。「佢值95分，嗰5分要扣係因為佢條腰唔係咁好，打波打得太多，呢個年紀應該要養生。」
比較之下，Jason就給Sarah開出99.5高分，「因為佢好鍾意臨瞓前食細細包嘅薯片，唔健康，講極都唔聽呀！」
打情罵俏，完全感受到他們濃濃的愛。
延伸內容：黃又南舊愛宣布婚訊 嫁金融才俊
延伸內容：我不是女神 莊莎娜
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
