發佈時間：14:59 2025-02-13
特色為「半鹹淡」廣東話和口頭禪是「師傅愛你」的七仙羽，出身於馬來西亞，有指她原名趙玲，其實她的原名是Dolma Tara，暱稱「七師傅」。
「趙玲其實唔係我原本個真名，只係我做記者時的筆名，我原本個名因為太長，所以後來出道，就用七仙羽個名。不過都唔係我自己改嘅，係我個師傅用道教扶乩，扶出一首詩，成首詩每一句的第一個字，夾埋就係七仙羽，於是我就用七仙羽個名出道。」
七仙羽父母曾於英國做生意 歐洲度過青春歲月
童年時代活躍於馬來西亞，後來舉家移民到星加坡，「因為星加坡的生活質素比起馬來西亞較好，所以我哋全家人過咗去發展，後來再移民去英國。」父母當年曾於英國經營生意，令七仙羽在歐洲度過青春歲月。
父母對七仙羽的期望，是希望她能夠成為一個醫生，「不過我好怕血，所以冇可能做到醫生，但係我反而一直對玄學好有興趣。」年輕時因體弱多病，於是拜師學習風水命理，更因在外國讀書，學習了西洋魔法。
温馨提示 : 欲知七仙羽師傅更多風水玄學見解及分析，可到七仙羽師傅專欄《仙羽指路》
初戀通着花fit老外 無奈傷心分手
「我的初戀是在外國發生，個男仔有一對藍眼睛，高鼻樑，好似童話故事的白馬王子，我非常之愛佢，可惜佢好花fit，令我好傷心，無奈分手。」
後來七仙羽到教堂做義工，那裏有一個女孩子義工，見到她愁眉苦臉，上前慰問，得知她原來失戀，於是教了她一個西洋魔法，去挽救這段感情。
「個女仔原來係巫師家族，佢教我拎住個水晶球，一路唸住魔咒，一路嗌住初戀男仔個名。點知唸咗幾日之後，個男仔真係搵返我，仲同我講非常之掛住我，要求同我復合。」
逝去感情如何留得住？七仙羽將初戀男友拒於門外，反而令她對於西洋魔法產生濃厚興趣，於是不斷拜師學藝。
修讀新聞系 曾於台灣當新聞部記者
七仙羽在十多歲回流到香港讀中學，畢業後留學歐美，大學主修新聞系，碩士主修商業管理，聲稱曾於克羅地亞、德國、印度等地居住和修行，又在台灣做了一年多新聞部記者，返港後任職過多本雜誌，同時工餘時間兼職看風水面相。
憑「七連鞭」「譚仔」「師傅愛你」闖出頭來
自2007年起以玄學家身份活躍於電視台，2009年又參與有線電視《怪談》節目， 2019年的《鬼同你上位》鬼屋探靈節目中，一句「師傅愛你」令她更加聲名大噪。她的一口「譚仔」口音，令她深受觀眾歡迎，她獨創的「七連鞭」更令人笑到捧腹，催使她甚至開埋棟篤笑，近幾年不斷接拍廣告，賺錢賺到手軟。
「個節目係半夜三更去間鬼屋探靈，幾個女仔比賽，佢哋當年冇乜工開，只係想有多啲曝光率，當時其中一個女仔撞邪，我見到其他參賽者喺度幸災樂禍，冇人理佢。
「嗰晚又落雨又凍，個女仔喺度狂喊，我覺得佢好可憐，我內心好唔開心，於是我攬住佢，俾安慰佢，衝口而出就講咗句「師傅愛你」，等佢感受到溫暖。」從此這句口頭禪，就成為七仙羽人所共知的icon。
提起這段往事，七仙羽十分感觸，覺得身同感受，不禁嗚咽爆喊。「我同情個女仔，深受其害。咁多年來，好多人都想整死我，想少一個競爭對手，個個都蝦我，笑我廣東話唔正，話我騎呢，啲人唔敢蝦其他師傅，因為有啲師傅好惡，會用粗口鬧人，但啲人就蝦我個人善良。」
七仙羽喊爆伸冤 被人貼街招斥神棍真相
近年七仙羽被人張貼街招，指她是神棍，她大方回應：「我知道邊個人貼我街招，在我背後踩我，佢都係行家，佢鬧我做乜收得咁平，做爛個市，我答佢：『我見人哋咁慘，收咁貴收唔落手喎！』佢就繼續鬧我：『你咪扮嘢啦！』之後就出現貼街招事件。
「啲人話我係神棍，我會諗係神仙，你諗嘢負面係你嘅事，我會將負面嘅嘢變成正面，我希望大家都要有正能量，等呢個世界充滿愛。」
喊到面上的化妝都溶埋的七仙羽，感慨地說，今時今日的她，身家已經不用憂下半世的生活。
「我發覺近年我醜樣咗，人又老咗，搞成咁，因為日日都唔夠瞓，不斷工作。其實我不愁生活，我淨係啲錢食利息都夠我過下半世。
「何況我在澳洲同埋荷蘭都買咗個森林，幾百萬港幣啫，好平，日日有野馬、野兔、松鼠出沒，好似童話世界咁，我絕對可以一走了之，慢慢享受人生，但係我有咁多徒弟、員工跟我搵食，佢哋個個都有家庭負擔，我唔可以就咁丟低佢哋。」
暫且放下養老的童話森林，唯有繼續在石屎森林裏打滾，繼續「師傅愛你」！
《東周網》訪談系列節目《星桄伴我心》2024年12月重磅嘉賓：
肥媽攬屍唱情歌 憶亡夫飲泣 搵胡楓哭訴對話大公開
「黑妹」李麗霞2段婚姻3次患癌「我其實係一個軟弱女人！」
《異空感應》阮浩棕演技大爆發 罕談緋聞女友何沛珈 致電某人激動爆喊真情流露
《東周網》訪談系列節目《星桄伴我心》2025年1月重磅嘉賓：
劉江「講呢啲」｜ 結婚51周年，分享獨門退讓心得｜爆周潤發古惑招𠱁跑山
獨家質詢馬清鏗「小三」五索 “我係賤人，但我住山頂，你唔恨得咁多！”
