更新時間：15:19 2024-04-26
發佈時間：15:18 2024-04-26
發佈時間：15:18 2024-04-26
恒指升穿17210點左右疑似三頂阻力後被大力夾上，由早前約16000點低位三爬兩撥飆高咗1700點，近期表現勁過累積咗龐大升幅的美股同日股。港股估值極為低殘(股)民所共知，但點解最近一星期先急升?據基金界人士指出，除咗中央推出鞏固香港金融市場的措施之外，原來同台積電(TSM)早排公布的第一季業績有意想不到的關係。
全球最大晶片代工生產商台積電上星期公布首季業績，受惠於人工智能(AI)晶片需求增加，業績好過市場預期，但公司同時調低全球半導體展望，兼且未有調高今年資本支出，令市場非常擔心熱炒了1年的AI概念去到水尾；加上後來荷蘭的鎮國之寶ASML第一季度新增訂單表現不濟，結果攬炒一直帶領美日股市不斷破頂的A I晶片股，早已成手貨的大戶開始借勢減持食糊，連股王英偉達(NVDA)同神仙股美超微電腦(SMCI)都不能幸免。
由於揸重美國同日本的AI晶片股，同時沽空中港股市屬近年金融大鱷最擠擁的交易，當這批大戶沽美日股票拆倉，就要倒轉頭補番港股。當中佔恒指比重最高又被這批大戶狂沽的股份如騰訊(0700)、美團(3690)同友邦(1299)等等，就由谷底大幅抽升。
至於港股呢次可以爆上幾多，睇呢幾日大市寒暑表港交所(0388)的走勢，短線應該仲係大漲小回格局，每次回調可以撈吓貨，下個目標應該係18100點左右另一個主要阻力位。
最Hit
