BEC發起的「香港可持續航空燃油聯盟」，連接機場、航空公司、燃油供應商等持份者力量，合力發展可持續航空燃料應用。
聯合國世界氣象組織（WMO）發布年度《全球氣候狀況》報告，再次敲響警鐘。所有關鍵氣候指標同步惡化，其中溫室氣體、全球均溫、海洋熱含量與海平面上升速率均破紀錄，大氣二氧化碳濃度更達二百萬年以來最高。
近年企業紛紛加入對抗氣候變化戰陣，低碳轉型已經唔只係品牌口號，更直接影響投資決策同資本流向。以美國Apple為例，集團近年積極推動供應鏈減碳，去年對比二○一五年整體溫室氣體排放大幅減少超過六成。另一巨頭Amazon今年亦宣布擴大碳市場平台，推出新型碳抵換額度，協助供應商與合作企業減少運輸和燃料嘅使用排放。
香港商界環保意識其實早於幾十年前開始萌芽。七、八十年代香港正值製造業黃金時期，工廠林立，煙囪處處。小企業係香港經濟基石，當年大家刻苦經營，對於環保問題唔了解亦唔算重視。直至一九八九年，時任滙豐銀行主席浦偉士憂慮香港污染問題，故牽頭成立私營機構環境委員會，號召十九間大型企業加入，共同推動政府同企業環保意識。一班具有遠見嘅商界領袖，促成後來商界環保協會（BEC）誕生。
BEC至今植根香港逾三十年，目前會員網絡超過三百間機構，目標引領商界綠色轉型，推動香港邁向淨零經濟。協會行政總裁吳家穎（Simon）學者出身，從事研究和政策倡議工作多年，主張用數據研究去推動政策落地。芸芸行業中，航空業減碳難度高，故此BEC於二○二四年發起「香港可持續航空燃油聯盟」，連接機場、航空公司、燃油供應商等持份者力量，合力發展可持續航空燃料（SAF）應用。BEC同時撰寫白皮書供政府參考，相關建議獲納入去年《施政報告》，預示基建配套與可持續航空燃料供應將成為下一階段嘅政策重點。
作為商界環保工作領頭人，BEC嘅辦公大樓亦非常環保；大樓雖然已有一定歷史，但仍能獲得綠建認證。環保樓由賽馬會資助興建，BEC將佢定位為「環保實驗室」，例如天台設置太陽能光伏板，自行生產綠色電力，不僅足夠整幢大樓使用，更可向電網輸出剩餘電力。另配備一系列節能系統，包括中庭設有雙層玻璃及太陽能隔熱膜窗戶，阻隔外界熱力，提升空調效能並降低耗電量；室內採用風冷式冷水機製冷，能源消耗可減少約四成一。環保成效顯著，促使大樓成為全港首幢獲得綠建環評鉑金級認證嘅商業大樓。
我覺得呢個「實驗室」好似一個市場跳板，可以幫商界測試各項環保生產技術，並期待「由實驗到應用再到市場」嘅模式得以擴展。商界係經濟活動主體，如果能夠帶頭實踐綠色轉型，確實會事半功倍。對於具有可持續發展前瞻意識嘅企業，環保甚至係一盤極化算嘅生意，好似Tesla二○二五年碳權銷售收入，雖然下跌兩成八但仍錄近二十億美元，喺盈利下降時更加係穩定嘅財務支柱。
