美麗華集團首席營運總裁陳宗彝（右）。
內地五一黃金周剛結束，五日共有約一百○一萬內地旅客人次訪港，較去年同期升約一成，打卡景點附近和旅遊旺區嘅零售餐飲店普遍受惠，而其中酒店業表現最為理想。旅遊促進會指黃金周內本港酒店整體入住率高達九成，房價亦升一成。
事實上，今年首季訪港旅客已達一千四百三十萬人次，再創疫情後季度新高；財政司司長陳茂波更預料，以全年計， 訪港旅客量有望超出原先預估嘅五千三百八十萬人次，可帶動總消費超過二千四百億港元，按年增加百分之九點五。本港旅遊業能否維持升勢？早前搵咗美麗華集團（0071）首席營運總裁陳宗彝（Alan）分享旅遊業前景，以及集團如何革新以迎合旅遊模式改變。
美麗華集團早前公布全年業績，旗下業務包括商場零售、酒店、旅行社等板塊，其中酒店全年入住率維持接近九成。酒店對面係清真寺，地理位置得天獨厚，於是集團近年積極升級酒店，增設穆斯林友善設施，如提供清真認證餐飲、禮拜毯、古蘭經、禮拜方向指示及瓶裝清洗器等，成功開拓中東及穆斯林旅客市場，更多次獲評為穆斯林友善酒店。
除拓展客源，美麗華亦牽頭成立「尖沙咀中部策略發展協會」，聯合區內持份者活化柏麗大道一帶。Alan分享，尖沙咀中部擁有殖民地歷史建築，如舊天文臺、訊號山、古物古蹟辦事處等，甚至九龍公園觀鳥點都具備深度旅遊價值。協會目前正爭取政府撥款，為榕樹兩旁增設燈光裝置，參考法國香榭麗舍大道嘅燈光節，營造晚間氛圍，並改善佐敦與尖沙咀之間嘅「黑洞」環境，令旅客夜間都能安心步行。
近年本港旅客量逐漸回暖，對酒店業固然係好事，不過業界同時面對經營成本上漲問題，聘請又有挑戰。例如為吸引年輕人入行，集團將每周工作天數由六日減至五日，單計呢項調整已令勞工成本增加超過一成半。加上酒店房租稅自去年恢復；人民幣升值令內地供應食材成本上漲；以及中東局勢推高大宗商品價格等，大大增加經營壓力。
體驗旅遊逐漸成為潮流，文化遊、美食遊、離島遊、行山遊、打卡遊等新形態百花齊放。當中美麗華旅遊亦順應市場走勢，開拓唔少體驗型旅行團，Alan補充一帶一路沿線國家，如沙特阿拉伯、哈薩克斯坦等，文化風俗同香港截然不同，酒店、建築別具歷史風貌，可以刺激旅遊需求。
近期市場熱議酒店改裝學生宿舍，Alan分析，主要源於寫字樓供應過剩、酒店勞工成本高企，加上香港正發展為全球教育樞紐，內地及一帶一路國家學生住宿需求增加，學生宿舍每呎回報率確實較高。不過佢亦憂慮，若太多酒店轉做宿舍，長遠會削弱香港接待過夜旅客嘅承載力，對整體旅遊業並非好事。
