Z世代成長環境普遍較富裕，需求由物質轉為精神，重視自我、精神健康。
嚟到五月，畢業生應付完考試，應該正忙於應徵，想當年（又）我未畢業已經不斷寄求職信，務求最短時間內搵到工開始賺錢。不過政府統計處數據顯示，二○二四年香港居民整體失業率百分之三，而十五至廿九歲年輕人組別「失業率」為百分之六點二；另一項調查更指，呢個組別中非學生或非就業年輕人有三成六並冇計劃搵工。其實，年輕人係「失業」、唔搵工，定係唔認為需要一份固定工作？
我覺得時代轉變，唔應該用以往思維批評年輕人嘅工作取態，反而應多了解並將新工作模式融入職場，至能夠畀年輕人發揮所長。泛指出生於九十年代中至二○一○年代嘅Z世代（Gen Z）出現，並陸續投入職場後，開始有管理層慨嘆Z世代正在「整頓」職場。有唔少僱主、上司反映Z世代唔聽人講，做嘢唔上心，又經常對工作抱有不滿，為「傳統」職場帶來衝擊。
我唔想標籤Z世代，文中用呢個名詞係泛指年輕一代。佢哋唔鍾意朝九晚五，重視work-life balance、平等等原則，樂於打破規條，呢啲都係Z世代特徵。而新一代年輕人加入職場，確實同「舊人」有文化差異。
Z世代成長環境普遍較富裕，需求由物質轉為精神，重視自我、精神健康。呢種特質亦反映喺佢哋對於工作嘅睇法，佢哋會為咗work-life balance或者工作意義而轉工，而非單單衡量人工前途等因素。例如，有年輕人為咗自我實踐而辭去專業工作，成為KOL。更多Z世代會搵副業，甚至根本冇固定工作，身兼數職。
有一份台灣人力銀行研究指，近六成Z世代認為理想工作形態，係有一份正職同時又有副業，做斜槓族（slasher）。調查機構認為數據反映Z世代對職業生涯嘅思維，已由過去「先求穩定再謀發展」，轉為「先追求彈性同自我實踐，再思考長期穩定」。研究指有三成Z世代打算喺未來兩年轉工，甚至有近兩成打算兩個月內辭職。可見新一代年輕人工作流動性亦比較高。
我一世打過嘅工一隻手數得晒，對於傳統打工仔嚟講，一份穩定嘅工作可以累積經驗、資歷、人脈等，亦享有更加穩固收入和福利，職涯前景更佳。僱主亦都唔鍾意密密轉工嘅員工，覺得佢哋唔忠心，當份工玩玩下。
不過Z世代又並非淨係玩玩下，相反，佢哋好重視一份工作有咩得着。德勤一份二○二四年研究提到，Z世代好重視職涯成長同學習經歷，有七成表示佢哋每星期都會花時間學習技能，包括溝通、領導力、情緒管理等軟技能，以及產業硬知識等，增值自己。
要協調公司團隊同Z世代新同事嘅工作取態，有大學建議上司提供更多指導，例如新同事重視成長機會，企業可提供部門以外實習同入職培訓。企業用人可以更有彈性，亦可以將工作分成不同專案，調派新同事加入，令佢哋更積極去own自己嘅專案，甚至以短期或外包模式合作，將斜槓族納入團隊。
