在抗戰勝利八十周年，九三閱兵前夕，到老友屋企打牌食飯，主人家食飯前旺到不得了，贏咗不少錢，到了接近尾聲，形勢逆轉，主人家輸番不少，但仍有錢贏，不過再輸就隨時會輸入肉。老友老婆有見及此，立刻話明日要睇閱兵，牌局到此為止，問我們有冇意見，我們當然冇意見，不過牌局停咗即是冇得翻身，唯有表示略帶遺憾。
有老友話《東周刊》點解可以咁容忍我，寫抗戰勝利都寫了一大段無厘頭，我話絕對不是無厘頭。家父早過身，沒有參加抗戰，但不少家父同學有參軍， 不過未經過大戰，日本已宣布投降。家父同學對日本投降並不感到雀躍，反而是略帶遺憾，因為當時形勢逆轉，如果日本唔投降，過多一兩年，在中國的七百萬日本軍人有機會被殲滅，最遺憾的就是日本政府並不承認戰敗，只表示終戰，就算是投降，都是向美國，而非向中國投降，家父同學話早知如此，就唔應該接受停戰。其實我覺得有多少奇怪，日本向中國以及亞洲各國簽投降書，點解唔係投降，現在話終戰，只不過是有美國撐腰。
全世界都認為，如果不是美國向日本廣島、長崎投下兩枚原子彈，日本是不會投降。其實，美國知道日本在兵力及資源補給不足的情況下，在中國以及亞洲其他地區已無戰勝可能，再多一兩年，在亞洲地區超過一千萬的日軍可能全數被制服，雖然未必會學蘇聯，將六十萬關東軍送去西伯利亞開疆拓土，最後只得三萬人返回日本，但陣亡的亦不會是少數。日本少了這批當兵的青年，戰後重建是非常艱鉅，美國有見及此，向日本廣島、長崎投下兩枚原子彈，逼使日本投降，其實是救了日本，美國話既然日本已經投降，大家就唔好繼續打，服役的日軍原地投降，接受安排遣返日本，這算是甚麼遣返，而是讓在亞洲地區千萬日軍安全撤回日本，戰勝國滿目瘡痍，戰敗國反而損失不大，如果抗戰勝利八十周年是在兩年之後，只要打多兩年，今日的日本不會是現在模樣。
九三閱兵，有人話是魔幻閱兵，但亦有人話幾魔幻都冇用，不少歐美國家冇嚟，我認為那些國家出於妒忌心態。我記得讀小學時，成績很差，每次都是僅僅可以升班，家母在開學前都會請其他同學家長食飯，講吓教子心得，每一次都高朋滿座，到了升中學，我發奮圖強考了全級第二，到家母請食飯時，竟然有一半人冇出席，家母話，如果我考尾二，就全班家長都嚟晒。
十年前，法國、捷克都有參觀閱兵，今年就缺席，法國缺席大家都明白，外銷版殲十吊打法國機王陣風， 如果印巴之戰， 陣風打敗殲十，法國一定會參加。至於捷克，政治取態變了，以往是中立偏中，現在是親美，美國唔嚟，捷克亦唔敢嚟，如果現在中國的軍備是低於世界水平，我相信大多數國家都會嚟。現在排第二， 以我的個案為例，那些缺席的國家是不忿參加，唔參加他們仍然可以幻想仍在以往的世界，但如果參加，以後就要面對現實，除了要接受中國是全球經濟體系排第二，更加要面對中國在軍備上早已大幅超越他們，唔嚟是一個最好選擇。
