有老友話我經歷兩間大富豪夜總會，點解第一間可以營業超過四十年，而第二間只是營業兩個月，雖然現在公布是暫停營業，但估計復業應該遙遙無期，是否受到市民北上消費影響？
我講大家未必相信，大富豪結業的確是受到市民北上消費影響，不過是第一間，而不是第二間。在改革開放之後，內地有不少靚女在娛樂場所搵食，歌仔都有得唱：三級靚女，中山珠海；二級靚女，飄洋過海；一級靚女，留在上海，不過，白天不出來。香港的頂級消費群不時去上海消費，沒有了那些人消費，香港的頂級娛樂場所就頂唔住，今日世界沒有了，中國城沒有了，最後連大富豪都要執。至於第二間大富豪結業的原因，簡單來說，香港現在大富的人多，大豪的人少，富人唔願意做豪客，即是冇大富豪，大富豪夜總會又如何能夠生存？
很多人以為在第一間大富豪營業的時候，是香港紙醉金迷年代，富人又多，又唔吝嗇用錢。其實是不對，當年的確是紙醉金迷，但富人遠不及現在，反之豪客就唔知多幾多倍。不過，豪客去娛樂場所最大目的並不是搵小姐，而是做生意，當年不少人除了一份正職之外，亦會搵外快，例如炒Quota，做代理等，我自己亦有炒Quota，收入多過正職幾倍。不過，日光日白很難炒，一定要在夜晚，在微醺兼有靚女在旁助興，生意很容易做得成，做到生意用錢一定會疏爽。但後來那些消費人轉移陣地，就算唔去上海，都會去深圳、東莞等地，即使鄧小平話香港舞照跳，都變咗冇得跳，大型夜總會全部執晒，重慘過今日啲酒樓。
有人話香港人無論財富及人均收入，都位於世界前列，多過第一間大富豪年代很多，但消費點解不及當年，連一間大富豪都養唔起？這的確是一個問題，香港人的消費態度變了， 不少人富有程度遠勝當年，但消費就降維，莫講話大富豪不能生存，不少著名食肆亦受到影響，不是說生意不好，而是消費降維，令到生意額不理想。不過，這亦是一個城市進化，世界上大多數城市的大型娛樂場所都被淘汰，代之而起的是一些小型、非常骨子，俗稱私竇的娛樂場所。投資大富豪的人卻要追尋昔日的光境，短期內結業絕不出奇，老實說，執得快反而輸少很多。
有人話點解新加坡及澳門都可以有大型娛樂場所，香港反而冇，又可以證明香港輸畀新加坡。澳門及新加坡可以容納大型娛樂場所存在，兩者有一個共通點，就是賭博，博彩與娛樂是孖生兄弟，如果冇賭場，大型娛樂場所是很難生存。
不少人對大富豪突然結業都表示遺憾，原因是去都未去過就執咗。老實說，我身邊的朋友當中，一個也未去過新大富豪，我亦很遺憾冇內幕消息可以八畀大家聽。
