港人出名鍾意去旅行，但講到旅遊達人，第一時間就諗起亨達創辦人鄧予立。鄧翁剛完成八十四日中國西北深度自駕遊，長征二萬八千公里後，轉身又去咗歐洲。鄧翁話，西北之行較一般辛苦，其中一個原因係好多地方住宿較簡樸，同當地食物太辣唔啱口味。我當然無鄧翁咁好魄力，孭住長短鏡四處飛，但有一點相似，就係對酒店有要求。我一般以悠閒為主，鐘意歎靚酒店，如果住入resort更加可以足不出戶。
陸叔快閃布吉，入住Rosewood Phuket。
臨近暑假尾聲，趁兩個孫女未開學，月初同屋企人快閃布吉。布吉係泰國最受歡迎嘅度假勝地之一，每年吸引超過一千萬名遊客，勝在物價低、景點多，又可享受陽光與海灘。根據泰國政府數據，今年布吉首四個月旅遊業收入近一千九百億泰銖，高踞泰國南部十四府榜首。
三代同堂出遊，計劃行程係一大挑戰，今次就實行佛系遊，入住布吉瑰麗酒店（Rosewood Phuket）歎返幾日，各自喺酒店搵節目，唔使傷腦筋。Rosewood Phuket係瑰麗集團旗下首間東南亞渡假酒店，坐落布吉西南部翡翠灣，距離芭東中心大約十五分鐘車程，交通相對便利。
酒店整體建築以石材、木材、植物同自然採光為主，除咗貫徹高檔豪華路綫，亦有泰式度假氛圍。我特別欣賞呢度嘅可持續設計心思，如應用大型可再生太陽能發電系統；設有雨水收集池以提供水源；「屋頂庭院」亦有利於保護生態。酒店共有七十一座別墅，分為八個房型，房間面積由一千至七千呎，採用大量落地玻璃窗，每間房都有客廳和獨立泳池，一起身可以出露台曬日光浴，再落去游水。休閒設施包括戶外無邊泳池、瑜伽庭院和健身中心，最正係個泳池同海灘無縫銜接，觀賞日落一流。
從酒店行去翡翠灣泳灘只係幾分鐘，海岸線六百米長，海水清澈見底，沙質幼滑，赤腳行好舒服，而且人流唔多，個人覺得對比芭東海灘，更為悠閒寫意。如果想落水玩，可向酒店免費租用水上運動設備，如獨木舟、站立式漿板划水、浮潛設備、浮潛鞋等。
女士們最愛，應該係度假村內嘅大型水療中心Asaya，除咗有按摩和身體護理，亦提供一系列包括Watsu水療、靈氣治療、「氣內臟」道家腹部按摩、生命能量治療和聲頻療法等另類療法。一家大細去旅行，當然要幫小朋友諗埋節目，酒店有兒童俱樂部、戶外自然區、室內游戲區、兒童廚房，可以畀小朋友放電。酒店仲提供廿四小時babysitting服務，等家長可以真正享受me time。
旅行方式有好多種，有人好似鄧翁用腳步探索世界；亦有人好似我咁輕鬆歎旅遊。我亦特別鍾意短trip，輕鬆出走幾日，返到香港身心都好似重新叉滿電，相信呢個就係旅行嘅魔力。
