社交媒體發展越趨多元化，逐漸演變成大眾接觸資訊嘅第一媒介。除咗日常生活訊息，亦有更多人透過社交媒體獲取新聞資訊。
路透新聞學研究所發表二○二五年報告，指香港人大多有定期睇新聞習慣，其中三成九以上每日睇兩至五次新聞，但年輕人對新聞興趣相對較低。至於新聞來源，有逾兩成九被訪者指主要依賴社交媒體提供新聞資訊，其次有兩成二人以電視新聞報道或節目作為主要渠道，另逾一成二人收睇二十四小時新聞台。加上傳統媒體嘅網上版、Apps和Podcasts等，數碼和電子渠道成為呢個世代主要新聞平台。
證監會聯同香港金融管理局等機構，共同打擊金融詐騙及欺詐行為，保障香港的普羅大眾。
喺十八至二十四歲年齡層，五成一被訪者以社交媒體作為主要新聞渠道，呢個趨勢點樣形成呢？其中一個分析，關乎社交媒體流行嘅溝通方式，包括敍事（narrative）同講故事（storytelling）。對於普羅大眾嚟講，客觀報道會顯得無溫度，而且唔係咁容易理解同產生連繫。相反，敍事可以令睇嘅人同資訊建立聯繫，例如內容創作者用自己主觀角度切入，將國際大事嘅前世今生整合，再加上圖畫同影片，將一堆冰冷嘅資訊串聯成連貫、帶有感情、能夠引起共鳴嘅故事。
大家平日返工、返學、處理家務已經好勞累，於是更加想睇一啲輕鬆嘅娛樂同小故事。而社交媒體上發布嘅內容，好多時都同日常生活有關，例如近日黑雨，有人會錄低邊個地方水浸，又或者講吓屋企樓下發生咗咩事等。相比起「硬資訊」，「軟資訊」較易睇和貼地，更容易令大眾產生共鳴。
即使係嚴肅新聞，講故事嘅敍事手法，亦可以令觀眾更易消化國際大事、財經資訊、社會議題等。尤其對年輕一輩，打動人心嘅故事先至夠吸引力。
社交媒體雖然成為重要資訊發布渠道，影響力越嚟越大，但大家對佢嘅信任度高唔高？路透報告指，相對小眾網上媒體，被訪者大致上對主流媒體機構較為信任。約一半被訪者會擔心網上資訊嘅真假，而一般大眾會去官方或可信新聞渠道核實資料。
報告又指，具有「新聞素養」（news literacy）嘅被訪者，較有辨別真偽嘅能力，因此反而會喺社交媒體、影片平台，甚至網民留言和AI聊天機械人處做查核。不過，AI「深偽」技術令社交媒體內容更加真假難分，即使有經驗嘅網民都有機會中招。
我講過好多次，大家喺社交媒體上見到「必賺投資貼士」、「買呢三隻股票就可以退休」等等，一定要小心提防，騙徒一樣識講吸引人嘅故事，引網民入局。證監會推出嘅「咪做水魚」反詐宣傳，都特別針對數碼平台上嘅投資騙局，提醒大眾喺網上見到好得難以置信嘅投資「機會」時保持理智。最後都提多句，除咗《人生交叉盤》facebook之外，我個人並無任何社交媒體帳戶，亦唔會開群組叫你投資，大家千祈咪做水魚。
