有老友同我講，香港DSE放榜，有十六個狀元，不過同我話大多數狀元會讀醫是有所出入。有報章話三分一狀元未擬習醫，老友可能被報章誤導，如果霎眼睇，會以為只有三分一狀元讀醫，睇清楚其實係十六個狀元之中，有十一個讀醫，超過三分之二，但有傳媒唔會話超過三分二狀元擬習醫，反而會話三分一狀元未擬習醫，唔算誤導，但報道手法有些特別。
有很多人不明白，點解有咁多狀元鍾意做醫生，老實說，做醫生唔係搵好多錢，這是社會反映出來，一個越富裕社會，會產生越多狀元，而狀元之中，大多數是富二代，家境清貧出到狀元唔係冇，而是很少，富二代的父母都有蘇東坡思維，但願生兒愚且魯，無憂無慮到公卿，唔希望子女跟着他們在商場打滾，希望他們可以做一份受到別人尊重的職業，做醫生是最好選擇。
現今醫學世界並不需要神農嘗百草，醫術不是不重要，但醫德才最重要，否則李時珍、華佗也無用武之地。但係呢個世界，總有醫生想賺到盡，建議病人採取無可無不可的療程以及手術。對於有錢的病人來說， 只要被說服到， 當然冇問題，但對於家境普通的病人，就會因而多了顧慮，甚至是壓力。所以做醫生，除了要揀個醫術好，也要碰運氣，撞到個有醫德兼不是賺錢為上的。
有老友話我年紀咁大，一定做過好多次手術，我講都冇人信，一次手術都未做過，十幾年前我認為自己太肥，應該要通波仔，在醫院搵了一個不認識的醫生，當時我已經上了手術床，打了麻醉針，醫生再睇我的報告，同我老婆講我不用通波仔。為安全計，做多一次顯影，最後發覺我的血管有百分之八十幾暢通無阻，或者是塞了十幾個巴仙，不需要通波仔。醫生話冇必要的手術是不會做，幾十萬手術費都冇收，這就是醫德。在很多地方，唔需要開刀都照開，更何況是我主動要求，至今我仍然未做過一次手術，只是每半年抽下血，見下醫生。
幾年前，有老友話去外地做體檢很平，幾百元可以搞掂，於是身體力行，做完之後睇份報告，嚇到自己暈咗，差不多所有零件都要換，都唔知要幾多錢埋單。我叫老友回港搵個私家醫生做多次，可能要使兩三萬，但唔需要換咁多零件。幾年之後，老友乜事都冇，仲話聽聞同時間有一些人在外地換了零件，但受到排斥，早已登極樂世界。我覺得，一個七十歲老人，換十幾歲人零件，身體又點會唔排斥，年紀大了， 就要接受現實， 活了超過七十歲已經是高壽，如果逆天而行強行換零件，不如隨遇而安，享受晚年生活，正常保健已經足夠。
