上星期日，老婆叫我一定要睇中年好聲音3，有一個女仔好勁，我唔信，唔通勁得過我老友個仔，中2冠軍。
何時才付滿，空虛的帳單，特朗普想唔Blue都唔得。路透社
老婆叫到，我一定聽，無可否認真係勁，我以為一定可以攞滿分，最後只得九十九分，周老師扣了一分，周老師的解釋是這一首是藍色怨曲，歌手黃博唔夠Blue，我明白周老師的意思，以前唱過這隻歌的幾位歌星，包括原唱林子祥、張學友、梅豔方等，都是非常Blue，但我認為這隻歌並不是唱自己，而是唱其他人，唔傷心絕對唔出奇，這一分被扣得相當冤枉。
老婆問，邊個唱可以得滿分？我認為如果由美國總統特朗普唱這隻歌，想唔攞滿分都難。我唔講大家都未必知道，特朗普在上任之後未夠三個月已經瘦咗十公斤，現在是一百○一公斤，二百公分，體重輕過我，又高過我，真係標準身材。很多人唔明白，特朗普做美國總統後，大權在握，點解咁Blue，理由很簡單，面對三十六萬億利息超過百分之四，每年以二萬八千億增長的國債，都唔知點搞，何時才付滿，空虛的帳單，想唔Blue都唔得。
特朗普手下大將如雲，謀臣如雨，當中不乏哈佛大學經濟學教授， 一定可以想到辦法解決美債問題。很多人以為，特朗普會賴債，或者以低息長債冚高息短債，我認為一定唔會發生，如果特朗普咁樣做，即係削弱美元威信，以後不但冇人買美債，連美元都唔敢持有。不過，我亦相信有特朗普幕僚曾經提出這個方法，但一早被否決，空穴來風，未必無因。
特朗普是一個商人，了解到美國欠債咁多的原因，美國是一個消費大國，換句話說，美國對大多數國家都出現貿易逆差，只要向那些對美國出現順差的國家收取關稅，是有機會付滿空虛的帳單。
做生意的人明白，無論特朗普徵收幾多美稅，都是由美國人民埋單，而非特朗普所講，由出現順差的國家埋單，但美國傳媒並沒有把正確訊息發放出來，令到很多美國人以為關稅由順差的國家埋單而支持特朗普，如果不是將訊息冚密，美國人是不會支持關稅，但是如果話其他國家埋單，那些國家政府又唔會開心，隨時會推出一些反制措施，直接推出相若關稅，現在就出現這個情況，雖然冇由官方解釋清楚，但是由短視頻發放正確訊息，那些拍攝短視頻的人會話自己是一個入口商，貨物要清關才可以進入美國，點解在關稅最初推出時冇人講，現在就咁多人講，實在令人費解。
現在特朗普唯有向那些國家說明美國關稅是由美國商人支付，他們毋須推出反制關稅。老實說，如果唔係特朗普高調話關稅由外國商人支付，估計是很容易游說成功，現在就很難講。
究竟如何付滿空虛的帳單，美國是全球最大經濟體系，如果每年有十萬億美元貨物進口，以平均關稅百分之二十計算，每年可以收取二萬億美元，鮑威爾減息百分之二，美債利息慳返七千二百億美元，已經可以唔使發債，美債唔再增長，帳單總會有付滿的一日。
