發佈時間：18:37 2026-10-16
對何家千金的印象，相信不止我，隔籬屋陳師奶都會覺得等同身光頸靚，怎會跟污糟邋遢扯上關係？偏偏何超儀演戲去到好盡，《維多利亞壹號》化身殺人狂，《怨泊》被邪教禁錮，而新作《拾荒法師》就飾演神婆，專門執拾附有亡魂的物件回家超渡。更重要的，是提攜她口中好靚仔的公司新人Iman演出警司一角。
垃圾婆角色由導演彭氏兄弟為何超儀度身訂造，她苦笑謂：「佢哋唔係整蠱我，係為我好⋯⋯其實點都有少少整蠱㗎喇，不過幫到部戲，冇所謂啦！雖然後尾真係要睇皮膚科醫生，又針灸，皮膚爛晒，出風癩，萬幾樣嘢發生。」
隔着大銀幕，都聞到她在垃圾場拍戲的惡臭，但她指最核突的事，反而是於濕漉漉的草叢開工。
「因為我着嗰對鞋好特別，用咗好多膠袋整，會滲啲泥入嚟。你知啦，有人會喺草叢屙尿，所以真係正咯，有尿騷味都要照演。去到垃圾場，就成地玻璃碎、釘、針，總之所有危險品都喺度。」
Iman聽見，即刻補多兩刀，指見到好多大過隻貓的老鼠周圍走，似乎嫌何超儀被打到瞓低，浸住臭水都未夠慘。
自己的權利自己爭取，有一場戲何超儀本來要一腳踢走張文傑的東西，但她擔心萬一跣低就大鑊，「如果連塊面都鎅到，呢啲垃圾喎，全港九新界嘅垃圾，打破傷風針都冇用啦，仲唔入廠？所以我搵咗替身，費事自己起腳後，踩蕉皮跣低。」
能夠犧牲靚樣，頂着惡臭加患皮膚病夾攻，依然盡力演出，這份精神，千金難買。
鄰居燒衣犯禁
《拾荒法師》連環揚威海外，在韓國富川影展獲頒「最佳奇幻電影女演員」，又獲選為泰國曼谷國際電影節「午夜單元」的開幕片，何超儀大讚首次拍戲的Iman腳頭好。
鬼怪之說，信則有，不信則無。電影涉及靈異題材，何超儀在開鏡的時候，跟足規矩拜神切燒豬，更找來師傅問蒼天，保佑台前幕後拍攝順利，平平安安。而訪問之際，正值農曆七月，很多人在街上燒街衣，問兩人會否有所避忌，兜路行避免踩到？
Iman點點頭，表示知道要尊重中國傳統習俗，何超儀則說：「我哋兩個都識㗎！連我老公（陳子聰）都知，因為我係神婆，師傅成日上嚟屋企睇風水。我記得講過一個古仔畀Iman同老公聽，因為我好鬼多屋企人喺『上面』嘛，要keep住燒元寶畀佢哋，咁對面街間屋個主人見到我哋浩浩蕩蕩燒得咁行，又叫工人姐姐摺啲嘢燒。我哋燒衣紙一定要燒到底，但對面屋個工人姐姐就趁老細一返入屋，成支水倒落去。跟住我師傅就話個女主人一定好大鑊，我問咩意思？師傅就話：『意思係等於人哋喺下面收緊禮物，你兜盆水潑落去塊面，你估佢嬲唔嬲？你激嬲咗隻鬼，佢可以令你冇命㗎！』結果個女人冇幾耐就死咗。」
說來淡淡然，好像麥太講故事給麥兜聽：「從前有個小朋友唔乖，第二天就死了。」一樣，實情真人真事，聽見都起雞皮疙瘩。
開天眼大整蠱
片中，Iman和陳家樂都不相信鬼神之說，直至何超儀幫他們開天眼，才驚見「新世界」。何超儀直言陳家樂好慘，要被滿口含着雞肉、菜、飯和啤酒的她噴到成面都係，又要NG。相比起來，Iman齋被啤酒噴面就好得多，但已足以令他畢生難忘。
Iman說：「嗰日喺隧道第一日開工，佢哋呃我話綵排，點知嚟真！我冇諗過一擰轉頭就噴我塊面，我呆咗兩秒，唔知發生咩事，反應好真實。」
何超儀說：「真係傻呀你，其實我一早畀咗提示，roll機前猛咁喺你面前刷牙，但你以為我真係刷牙囉！」提起這次大整蠱成功，她笑得開懷，有半秒忘記了自己拍攝時，也吃盡苦頭，出入臭氣熏天的垃圾場。
「陣味好勁，但我哋慣咗，同埋周身生嘢呀，好彩冇生喺面，濕疹、風癩、玫瑰痤瘡，乜都出晒嚟。個泥地好污糟，入到叢林先得人驚，導演問我同家樂仔可唔可以喺山邊條路行落嚟，但條路冇嘢扶又跣，我係驚嘅，所以推咗。」
如果有機會，Iman樂意開天眼，認為望到「他們」，「他們」就不會傷害自己。何超儀即刻糾正他的想法，說：「我就唔想開天眼見咁多嘢，試過去外國拍戲，自己瞓一間房，撞過一、兩次鬼。有個頭瞓喺張櫈度，瞓瞓吓覺又搞我張被，係咁想整醒我，搞到我要念經超渡佢。」
幫陳子聰監場
Iman本來是醫生，後來被何超儀夫婦發掘而來港發展，兩人既是僱傭關係，又是同屋主。
「我細細個已經成日想做演員，𠵱家只係啱啱起步，周潤發、羅拔迪尼路呢啲先係演員。今次角色性格同自己好唔同，我覺得咁先有挑戰、夠好玩，如果太相似，寧願唔做好過，呢一方面，何超儀幫咗我好多。」幫忙的地方，包括教他用嬲爆的語氣講粗口對白，解釋給他聽香港的職場文化奉行「唔做唔錯」，做錯了，反而有機會被老細「照肺」。
至於之前身體出狀況的陳子聰，今次擔任電影監製。何超儀指老公是一個大好人，「佢唔係好識鬧人、話人，亦唔識捉邊個偷懶，咁呢啲嘢就等我幫佢做啦！睇吓現場副導演嗌邊個，嗰個人要等6分鐘先出現，到底發生乜事。老公負責喺後面睇數，我就叫佢得閒去片場望吓。如果佢冇咗我，唔會係一個稱職嘅監製。」
《拾荒法師》未上映，第2集已極速拍完，男主角換上Iman。何超儀說：「Iman飾演一個戲班小子，我同佢等於現代嘅楊過同姑姑，有感情戲。我照舊演拾荒法師，但故事講佢瀨嘢，會搞笑地捉妖，又有好多動作鏡頭。外國人好鍾意搵我演壞蛋，所以要拍部戲做俠女，畀個參考佢哋，等佢哋知我做正義俠女時仲好睇。」
那麼，找她演靚女可以嗎？「梗係好啦，第2集我塊面冇咁污糟，係着運動衫嘅姑姑，Iman就靚仔喇，因為落咗order唔准佢唔靚仔。」
懷疑的腳步
何超儀在片中常說一句對白：「功德無量」現實中，她覺得幫忙倒垃圾的婆婆，真正做到這個境界，「香港人真係要多謝佢哋，佢哋絕對係香港嘅中流砥柱。」
為了揣摩角色，她有留意街上推車仔執垃圾的婆婆。問她拍攝時有否遇到困難，例如反車？
「我冇多垃圾多到反車，不過記得第一個shot講我嘅背影推緊垃圾，劇組搵咗一個替身去幫我推，跟住我癲咗，我話：『你點可以搵一個替身去代替主角第一個shot？我係出嚟演戲嘅演員，我又唔係跛，你應該我推吖？同埋你嗌咗我喺度，我成個妝做好晒，着晒戲服，係咪應該我推？』
「佢仲要特登拍佢嘅腳步，令我鬼咁嬲，後尾我推開個替身話：『對唔住，唔係你唔好，係我想用我嘅腳步。』你諗吓，如果佢開咗步先，我係咪要成套戲跟佢？咁咪好戇居，請我嚟做咩？你不如搵佢拍啦！所以我話唔得，因為我個角色成日都懷疑四周圍嘅嘢，咁懷疑有懷疑嘅腳步，所以我就自己做囉。」
合理的堅持，合適的登場方式，正正就是一部好電影的基本條件。
延伸閱讀：陳子聰近10年屢做重建大手術 去年再開胸搭橋 公開感謝老婆何超儀︰佢獨一無二
延伸閱讀：何超儀為新戲《拾荒法師2》接受特訓練到成身傷 監製陳子聰稱擔心 彭氏兄弟12年後RE-U執導
