蛇年首個交易日恒指紅盤低收七點，而睇返數據，自一九七七年起四個蛇年都「例跌」，平均跌幅達一成四；其中二○○一年，受累於科技股泡沫爆破，加上美國九一一事件衝擊，全球經濟陷入衰退，恒指全年下瀉逾三成二，表現最差。今年又如何？中信里昂蛇年風水指數，預測港股喺蛇年將蛇行前進，春冬兩季預期漲勢良好，漫長夏日則低迷無力，全年小幅下跌；但又籲投資者唔好「杯弓蛇影」，避免讓毫無根據嘅恐懼阻礙前進步伐。
（後排左至右）黃偉豪、溫傑、阮子曦、溫鋼城。
雖然恒指喺乙巳年首個交易日隨外圍回落，但最終穩守兩萬大關，其中AI概念股受惠於人工智能大模型DeepSeek，市場憧憬中國AI發展，相關科網股炒上。早前財政司司長陳茂波亦向幾個AI大模型問股，總結後寄語後市「巧若靈蛇、順勢前行」。
今年港股能否打破蛇年下跌「魔咒」？今期同股評老友，包括中薇證券研究部執行董事黃偉豪（Ravi）、凱基亞洲投資策略部主管溫傑（Kenny）、華富建業證券投資策略聯席總監阮子曦（Harry），以及iFAST Global Markets投資總監溫鋼城（Harris）傾下。
四位股評人認為，港股信心往往來自內地政策或經濟數據，而國家統計局數據顯示，上月居民消費價格指數（CPI）按年升百分之零點五，升幅創五個月高，除受惠春節效應外，亦反映逐步走出通縮陰霾。為推動中長期資金入市，中證監上月多招齊發，例如未來三年公募基金持有A股流通市值每年至少增長一成；另今年次批保險資金長期股票投資試點將於上半年落實，規模擬定為一千億元人民幣。
幾位老友都提到，兩會下月開鑼，市場憧憬再推重磅招數，若然利好政策落實，帶動經濟數據回穩，預計港股五至七月將迎來轉機。至於後市走勢，Ravi、Kenny同Harry預計支持位為萬七至萬八點，上望二萬三至二萬四目標價。而Harris有見近月內地經濟數據穩中向好，有利支撐港股，故睇好有望衝上二萬五關口。板塊喜好方面，佢哋傾向中特估同油股，派高息兼夠穩陣；而蛇年AI股當旺，半導體同軟件設備股都可留意。
近日金價接連破頂，紐約期金一度刷新歷史高位，現貨金同樣創新高。Harris認為金價現水平高處未算高，貿易戰、地緣政治及息口下降等因素將帶動避險需求，今年有機會升穿每盎士三千美元大關。
對於股市，我個人趨向進取，預料今年呈先低後高格局，恒指喺萬九至二萬五之間上落。雖然過去四個蛇年都跌市，但大家要睇返各個蛇年之前都係升市年，而過去幾年中國經濟積弱，港股根本無乜顯著升幅，因此今個蛇年唔一定會「跟跌」。分段嚟睇，特朗普喺第一季會好多動作，因此市況較不明朗，而中國一般會喺兩會後至出大政策，我期望下半年經濟可借東風向好向穩，秋風起、三蛇肥。
