龍年港股雖未「飛龍在天」，但已一洗兔年頹氣，臨近年底更急起直追，帶動恒指喺龍年升逾兩成八，年廿九收市企穩二萬關。進入蛇年，美國總統特朗普重掌白宮不足一個月已連番出招，原定向加拿大及墨西哥開徵兩成五關稅，兩日內又暫緩實施；另維持向中國加徵一成關稅，市場預計中美角力將持續牽動環球投資市場。
伍禮賢（後左）、郭家耀（後中）及林嘉麒（後右）。
睇返二○一八年數據，當年特朗普打響中美貿易戰第一槍，加上美國加息，港股與外圍股市回吐等因素影響，拖累恒指全年埋單跌逾四千點，跌幅達一成三，為七年最差。同年美股亦難逃一劫，市場恐慌指數VIX飆升一點三倍，三大指數更創十年低位。特朗普二點零會否令歷史重演？今期就搵嚟三位股評老友，包括港灣家族辦公室業務發展總監郭家耀（Matthew）、元宇證券基金投資總監林嘉麒（KK），以及光大證券國際證券策略師伍禮賢（Kenny），一齊點評蛇市走勢。
雖然上年美股大豐收，三大指數多次刷新紀錄，不過一眾老友認為中美博弈未見緩和，今年市況或機中有危並持續波動。KK指市場憧憬特朗普上台後，將推動降低企業稅率，但貿易戰升溫或削弱企業盈利，而且政策朝令夕改，預計後市起伏甚大。而Matthew提到，目前美股估值相對高，加上聯儲局減息步伐放緩，美元逐步轉強，帶動美債息走高，將局限資金流入美股。
至於貿易戰對中國嘅影響，花旗報告預測，今輪對華關稅對中國出口或造成一點九個百分點負面影響，經濟增長負面影響僅為零點三個百分點。事實上，經過首輪貿易戰，中國已具應戰經驗，例如推出反制措施；人民幣貶值；減息降準；發行大規模特別國債等，加上中國對美國仍有龐大貿易順差，防禦力較高。
三位都同意，以前話美國打噴嚏，香港會感冒，但睇返過去幾年數據，美股一片輝煌，而恒指表現卻背道而馳，到龍年至結束四年跌，相關性逐漸減弱。隨中資股比例漸增，內地國策成為港股風向儀，去年組合拳刺激下，恒指十月曾越二萬三全年高位，月內爆升六千幾點。Kenny分析，三月兩會後或有大規模刺激政策推出，連同港股估值長期偏低、企業盈利增長可期等因素，佢樂觀預計恒指後市有機會衝上二萬五水平。
息口變化同樣左右大市走向，聯儲局自去年九月已連續三次減息，累計下調一厘，摩根士丹利預期今年六月將再度減息。三位老友都睇好高息中特股、金礦股等板塊，高派息兼夠穩陣。我個人就覺得，今年「牛一」已經出現，先見二萬一，約等於二○二四年度歷史市盈率十一倍，技術性嚟講由一月二十二日底位，去到二萬二千七百（二○二二年高位）嘅話，則完成終極「頭肩底」；再破呢個位可以講「牛二」到臨。其他股評老友有咩睇法？下期再續。
