踏入乙巳蛇年，我喺呢度祝大家新年進步、身體健康、心想事成、財運亨通。每到農曆新年，我都會邀請老友記玄學家羅奇峰（Raymond）同我哋講下新一年嘅流年運程，希望大家可以知進退，懂時機，從而把握蛇年機遇。
金融玄學家羅奇峰。
陸叔：Raymond，其實未踏入新一年，我哋已經睇到世界各地出現唔同狀況，好似韓國政變丶美國洛杉磯山火丶以巴停火，尤其係美國總統特朗普就任後，第一日已落實不同政令，令世界原先嘅局面出現突變。我想問嚟緊新一年，情況會唔會繼續呢？
Raymond：大家都知道二○二四年正式踏入「離火九運」，而火代表戰爭、變革、新文明外，適逢二○二五乙巳蛇年開始，世界進入火地嘅流年，連續三年（明年「丙午」馬年丶後年「丁未」羊年）都極之火旺，所以今年可以話係動盪時期嘅開端。另外值得留意嘅係，今年《皇極經世》嘅年值卦為「澤火革」，亦係象徵變革，所以未正式踏入新一年，各地出現不同大事，其實係今年流年嘅預演。
陸叔：聽你咁講，今年會好多突變事情，又有好多新事物，對於投資嚟講，會唔會係一個防守嘅流年呢？
Raymond：或者我會咁睇，每一個流年，都會去好同唔好嘅地方，最重要係見機而行。正因為今年係變革之年，又處於屬火嘅大運及流年，科技、AI、虛幣、生物科技、量子電腦等革新概念股仍然會係炒作焦點。不過要留意係好多新概念出現時（好似過年前內地出咗DeepSeek人工智能），隨即令美國AI股回軟，正好反映越多變革，市場反應越敏感。今年世局多變，預期投資市場（不論股、匯、債、虛幣）會更加波動，所以細注博波幅係其中一個策略，反而留多一點本錢保留實力更為重要。
陸叔：講開股市，我哋唔可以忽略今年中國嘅經濟復甦步伐，如果從堪輿角度出發，中國有無運行？對中港股市會唔會有正面啟示？
Raymond：中美爭拗好似有吹和風跡象，但我唔會將特朗普一時一樣嘅口術放上心，因為既然今年係多變之年，無可能出現「一錘定音」天下太平嘅格局。不過從卦象而言，中國剛剛轉入另一十年，卦為「風山漸」，經濟復甦之象只會以「漸」形式呈現，仍要較長時間復原，所以好難為投資市場帶嚟強勁動力。幸好縱觀環球星象而言，中國今年唔似韓、日、美國處於動盪區域，即使有美國嘅壓力，仍可以喘息透氣。
陸叔：香港人最關心嘅樓市，今年會唔會有啲轉機？因為香港股樓不濟、財富效力不顯，稅收大減，對於面對結構財赤嘅香港，始終唔係一件好事。
Raymond：有關樓市，我連續講咗幾年，香港樓市返唔到「八運」時咁暢旺，仍會低迷一段時間。價啱可以自用，炒賣賺資本增值空間真係難。香港嘅九運風水大局遠不及八運，能夠止血已經係好好嘅情況。
