香港打工仔出名「熱愛返工」，求職平台CTgoodjobs最新發布嘅《二○二四年香港打工仔工作快樂指數問卷調查》顯示，上班族快樂指數連續兩年回升，問卷以十分為滿分，今年升至五點三分合格水平，但平均工作壓力指數仍達六點六八分，未見明顯改善，影響因素包括個人發展、公司氣氛、上司或老闆態度等。
要吸納人才，除咗薪酬之外，一間公司嘅員工福利、企業文化等都係關鍵因素。
講到打工天堂，人力資源公司Remote列出二○二四年全球最佳工作與生活平衡嘅地區，其中新西蘭名列首位，當地一年有三十二日法定假期；法定病假受薪比例不少於八成；僱員平均每周工作三十三小時等。而法定產假亦高達二十六周，比香港多十二個禮拜，無疑係孕婦福音。
雖然過去幾年香港經濟轉吹淡風，但失業率大致平穩， 部分行業更出現人手短缺情況，其中餐飲業首當其衝，洗碗同樓面工時長兼吃力，長期出現有工無人做嘅困局。要吸納人才，除咗薪酬之外，一間公司嘅員工福利、企業文化等都係關鍵因素。臨近歲晚，日前香港麥當勞斥過千萬元（港元，下同），向過萬名員工大派一千元新春利是。另適逢香港麥當勞五十周年，集團將於下月一連三晚舉行員工晚宴，筵開逾六百席，邀請近八千員工參與。
員工滿意度關乎ESG，其中好多企業關注性別多元化。隨女性勞動力持續釋放，職場上男女平等意識逐漸提高。《女性職場指數》Women Workplace Index（WWi）早前指，香港女性在管理層佔比不足兩成，雖有增加趨勢，但依照當前增速，香港可能仍需七十年，才能實現上市公司董事會性別平等。
為進一步推動女性友善職場，信和集團（0083）推出「信和女性連繫計劃」，包含一系列有益身心活動，如茶敘、瑜伽、冥想修練、農務工作坊、女性賦能講座等，助女員工擴闊生活圈子。另安排師友計劃，邀請女高管配對年資較短嘅女職員，藉日常溝通及定期會面，啟發女同事嘅職涯同個人成長。集團目前男女員工比例各佔一半，而擔任管理職位嘅女性超過四成，處於高水平。
除咗留住員工個人，華懋集團更想辦法留住佢哋個心。例如辦公室採用開放式設計，連CEO都無私人房間，方便同事加強溝通；另設員工飯堂，所有員工均可享免費午餐，經理級或以上更可獲酒店用膳額度。華懋亦將企業關懷文化延至團隊家人，自二○二一年起，推行員工子女獎學金計劃，以表揚佢哋喺學術上嘅卓越表現，去年得獎人數達六十名。
新鴻基地產（0016）則着重員工個人和事業發展，投放好多資源喺MT計劃，每年招攬本地、內地及海外著名大學優秀畢業生，重點栽培。另外每年都會派送高級經理參加海外著名大學課程，又安排諾貝爾得獎者、業界專家及海外學者為管理級員工主持講座，加強領導技巧和商業策略等知識，亦有助留住人才。
