認識鄧予立二十幾年，當時佢創立嘅亨達國際剛上市，舉辦投資研討會邀請我做講者，佢講匯我講股。當時佢因為業務經常飛，留港時間好少，佢講笑話有一次返港覺得自己個辦公室好似有啲唔同咗，但又講唔出有咩唔同，後來至知辦公室改裝過，佢個房門移咗去另一邊。鄧翁雖然四圍飛，但佢從來無時差問題，同事有事搵佢亦唔使問幾點，無論何時何地電話響三聲之內佢一定接聽到。
鄧予立達成遊歷一百五十個國家的目標。
亨達喺華資企業之中屬極早採納職業管理人制度，過咗創立期已經開始培養MT做未來接班人。鄧翁由二○○八起決定淡出公司管理第一線，交棒畀第二梯隊，之後就更自由自在遊世界，由寓工作於娛樂、寓娛樂於工作，變成純為旅遊而旅遊。不過佢做外匯幾十年，對得數字多，周遊列國之餘開始數下自己去過幾多地方，到二○一二年已經遊歷八十幾個國家地區，喺呢個基礎上鄧翁訂下目標，希望喺七十歲之前達成踏足一百五十個國家地區嘅目標。
有咗目標，鄧翁就開始密集式出遊，而且專門揀未去過嘅地方，經過七、八年勤力「跑數」，終於到二○二○年七十歲時達到一百四十八個國家地區，本來應該比原定時間遲少少就夠數，可惜趕上疫情，終於拖到上年至完成目標。一百五十個國家地區之中，鄧翁第一個踏足嘅係法國，第一個城市係巴黎；至於第一百五十個則係亞塞拜疆。到達當地酒店時，同事預備咗一幅錦旗，通知酒店為佢送上驚喜，增加儀式感。
鄧翁介紹，亞塞拜疆係迷你版杜拜，本身有舊城區和城堡之類嘅古蹟，而由於佢有石油資源，所以就仿效杜拜大力發展經濟，推展現代化工程，故有新有舊。另外，亞塞拜疆被稱為火之國，有差不多四百座泥火山，佔全球總數約一半。
總結過去幾十年旅程，鄧翁話可以分三個階段，最早期係「業務性」，第二階段係「娛樂性」，到訂下目標後就進入「瘋狂式」旅遊，有時甚至諗起就起行。如今目標達成，鄧翁係咪會轉返悠閒模式？事實上，剛遊完亞塞拜疆，佢已經到訪第一百五十一個國家亞美尼亞，並且訂立下一個目標，要喺五年內遊歷一百六十三個國家地區。
讀萬卷書不如行萬里路，有時親身踏足一個地方，會令人改變固有印象。好似印度可能畀人感覺唔係咁乾淨，但去到後佢發現呢個國家色彩好繽紛。又例如見識過不同地方嘅古蹟和古文明，發覺一啲地方嘅地理特徵和古蹟好相似，其實文明源頭可能好接近，慢慢會萌生出世界大同嘅觀念，更加接受多元文化。
鄧翁旅遊鍾意獨來獨往，但係旅途中會認識很多人，哪怕語言不通都可以靠身體語言溝通。佢覺得年輕人容易無信心，交流時會擔心自己表達能力不足，但去旅遊同世界各地人溝通就可以放開懷抱，訓練獨立能力和自信。
