「我的美酒跑車相機金錶也講究。」黃偉文填詞嘅陀飛輪，道出不少男士喜好。其中法拉利係好多男士dream car，而所謂古老當時興，一架一九六○年出廠嘅法拉利經典跑車250 GTO，幾年前以約三點七億元（港元，下同）天價落槌，至今仍為史上拍賣價最高跑車。亦有天降古董嘅「民間傳奇」，早前有港人喺社交平台發文指，去超市購物找續時，竟收穫一枚一八七九年鑄造嘅古董硬幣。後續有人翻查資料，發現同一年份嘅硬幣曾以二十四萬元拍出，連佣金達二十八點八萬元。
典亞藝博聯席主席黑國強（左）。
事實上，「古董」一詞目前無明確定義或界線，從錢幣、郵票、火柴盒、乃至瓷器、老爺車等，只要有歷史或藝術價值，就有市場需求。早排認識到一位古董專家黑國強（Andy），佢係黑氏古玩第二代繼承人，亦係藝術博覽會「典亞藝博」創辦人，從事古玩業逾三十年。
Andy父親為著名古玩商及收藏家黑洪祿，專攻明、清古典家具。佢一九四九年從北京南下香港，喺親戚經營嘅工藝店做學徒，主要賣二手貨；其後自立門戶，於尖沙咀經營古董業務，包括玉器、翡翠同珠寶買賣等。Andy同我分享，當年外國人熱衷於收藏東方古品，而尖沙咀係香港古玩集中地，由於靠近碼頭，客源包括海軍軍官、水兵、船長，以至各國領事館外交人員。當年資訊透明度相對低，未有交易數據紀錄，黑洪祿買賣全憑經驗同專業眼光。
作為「古二代」嘅Andy從小出入父親古董店，耳濡目染之下，到十八歲畢業後便隨父親入行，並由店舖雜工做起，負責洗筆筒、洗盒，為家具打磨、上蠟等小差小事。捱過幾年木人巷之後，佢開始投入古董收藏，於一九九六年喺河北購得生平第一件藏品—明中期紫檀整雕如意雲紋枕頭，從此踏上古玩之路，走遍大江南北「跑貨」，到北京、天津、山西等內地多個省市「尋寶」；另遊歷歐美古董博覽會，吸收西方古玩文化。
闖蕩過後，Andy於一九九九年回港，開設古董家具店「研木得益」，利用多年所得經驗和見聞，喺古玩行業大展拳腳。另外，佢眼見香港欠缺如歐洲TEFAF呢類重量級國際古玩藝博會，於是喺二○○六年毅然創立「亞洲國際古玩及藝術品博覽會」。首屆喺華潤大廈舉行，當時只有寥寥十數家古董商參與；直至二○一○年藝博會易名「典亞藝博」（Fine Art Asia），參展商數目逐漸壯大，至今成為藝壇公認亞洲最頂尖嘅藝術品博覽會。
問到點樣融入古玩潮流，Andy就話荷包斤両並非最重要，反而着重於穩定嘅心理質素同好學心態，切忌盲目入市，入貨前應了解古董背後歷史，方能買得好物兼得到古玩樂趣。呢點買「古」同買「股」有異曲同工之處。
