上周適逢聖誕長假，把握時間去悉尼短遊。眾多目的地之中，澳洲可謂我最常去嘅後花園，當地天氣宜人，尤其悉尼等大城市美食多元化，出行亦便利。澳洲近年成為置業熱點，我去得多覺得當地經濟不俗便投資置業，多次小住慢慢亦愛上呢度生活。今次喺悉尼度過熱辣辣嘅聖誕節，順道一探當地經濟氣氛和物業市道。
陸叔聖誕假入住悉尼富麗敦酒店。
自二戰後，大部分澳洲人都懷有一個「澳洲夢」（Great Australian Dream）—上車置業。所指嘅並非數百呎蝸居，而係擁有一間花園獨立屋，前院種嘢後院設燒烤爐、泳池，有足夠空間與親朋相聚；當地人視之為人生一大目標。呢類自置需求並未令樓市大熱，但自二○○○年股市大幅下跌後，澳洲政府推出優惠政策托市，樓市炒風逐漸成形。根據房地產顧問公司CoreLogic最新報告，澳洲受到房屋短缺和移民人口增加等因素影響，多個城市樓價持續急升，悉尼升幅尤其顯著，現時平均樓價約六百萬港元，相當於當地家庭全年收入十三倍。
澳洲央行上月宣布維持基準利率四點三五厘，已連續九次會議維持息率不變；雖然減息落空，但當地樓市仍然企穩，除咗剛性需求帶動，當地宜居生活環境亦係一大購買誘因。據經濟學人智庫（EIU）發表嘅《二○二四全球宜居城市指數》，澳洲五大城市均打進二十大，包括墨爾本、悉尼、阿德萊德、珀斯同布里斯班，反映環境、醫療、教育、基建等生活條件良好，而且犯罪率低，為宜居之選。
為方便出入，我今次入住悉尼富麗敦（Fullerton）酒店，屬信和置業（0083）旗下，前身為郵政總局大樓，坐落繁華中心商業區馬丁廣場一號，為市內著名歷史地標。作為新加坡知名品牌，Fullerton向來走奢華路線，改建後共提供四百一十六間客房，最大嘅Heritage Long Suite為昔日郵政局長辦公室，除沿用原建築嘅雲石壁爐，並保留一張一八七四年起沿用嘅古董長書枱，有歷史價值亦反映信置用心保育文化。餐飲有新加坡Fullerton影子，除提供正宗東南亞美食，亦有當代澳洲菜，連新加坡Fullerton著名雞尾酒Singapore Sling都帶咗去悉尼，變成有當地特色嘅Sydney Sling。
悉尼係國際著名旅遊城市，市中心區步行可到達唔少著名景點和餐廳，而且巴士、火車、地鐵和渡輪等公共交通非常發達，用當地Opal Card好方便，適用乘車優惠自動喺卡上扣減，每日搭車仲有上限金額，過咗上限唔會再扣錢。朋友租車同我哋去遠少少玩，租車app都好方便，可以自選停車場攞車，用app就開到鎖，用完亦可選擇唔同停車場還車。
當地聖誕商場人流不俗，餐飲場所都見旺場。上月澳洲龍蝦恢復供往中國，代表中國對澳洲解除最後一項貿易限制，亦象徵維持四年嘅中澳貿易戰全面結束。事實上，中澳關係逐步回暖，二○二三年中澳貿易額同比增長近一成至新高，面前雖然有美國關稅嘅不確定性，但相信兩國都會致力加強貿易往來。
