發佈時間：11:00 2026-05-03
有「鐘錶界美女」之稱的胡曦文（Christy），親手打造的時尚品牌「CRISATHENA」產品色彩繽紛，銅鑼灣分店以粉紅和綠色為主調，原來實現公主夢的背後，隱藏着她對媽媽的愛。
「成立品牌前，我有過低潮，所以衫、袋有好多顏色，想帶多啲快樂畀人，陰天過後有彩虹嘛！粉紅色好浪漫，係我媽咪最鍾意嘅顏色，𠵱家佢唔喺度，粉紅色就好似我哋之間嘅聯繫，好有意思。」
她的人生出現過不少低潮，先是07年面對母親的離開，之後生過子宮瘤，胸又有瘤，令她明白到每日開心最緊要，「額外錢係福報，感恩個天待我不薄。」
美術天分
胡曦文由鐘錶踩過界攻入服裝、手袋、飾品市場，獲佘詩曼、陳自瑤、黃翠如等圈中人力撐，品牌還登上過國際雜誌封面。她自言腌尖，每款設計都有故事，而美術天分，小時候就開始展現。
「媽咪做時裝生意，影響咗我好多，佢着嘅衫好靚，又帶我去旅行、去見識。媽咪畀咗一樣嘢我，到𠵱家都好受用，就係佢嘅creativity。佢成日同我講：『女，你做到㗎！』好鼓勵，我好proud of媽咪，佢從來冇試過話我唔得。好彩有媽咪培養，加上自己都鍾意睇設計師由出道到出名嘅過程，先至令我有今日。」
品牌現於香港有3間分店，其中兩間在今年初相隔不足兩星期開張，她回憶當時好攰，試過幾次敷面膜後，一覺睡到天光，「真係癲㗎！知道未洗面，但攰到連起身都冇力。」
壓力需要找出口，近兩年她開始學唱歌減壓，還因此與「同學仔」胡定欣結緣。她笑言喜歡睇對方主演的《城寨英雄》，兩人志趣相投，後來還合作聯乘推出紫色手袋。
提到北上消費成為大趨勢，幸而獅子座的胡曦文有打不死精神，認為有危就有機，但開實體店以來，難免遇過古怪的客人。「有次有個男仔走入嚟，掂售貨員隻手，真係有啲驚！」
遇上對的人
胡曦文有個拍拖多年的金融界男友羅御軒，相識經過，緣於當年男方出書，邀請女方寫序，種下情緣。雖然胡曦文是工作狂，但男友從來冇詐型。
「我欣賞佢見識廣博，其實我私底下係一個未長大嘅BB，有時做嘢好攰，返到屋企只想輕鬆，佢會陪我玩，呢樣嘢最夾。有時同佢講吓生意又得，同埋大家有個使命，都希望搞好個慈善基金（JC Happiness Charity Foundation），希望多啲人關注精神健康方面的問題。」
對的時間遇上對的人，計劃幾時結婚？她笑說：「其實本來好早話結婚，但我發覺我唔鍾意生BB，我鍾意佢追吓我先。」
繼續享受拍拖生活，又有袁偉豪的兒子「袁咕碌」做契仔，對她來說，目前生活美滿，加上之前子宮和胸部都生過瘤，更令她對人生有新體會。
「好返喇，割咗出嚟唔係cancer 。以前好忽略健康，淨係掛住做做做，做到生咗3個幾cm嘅瘤，𠵱家啲人覺得我瘦咗，係因為攞咗個好似5個月大BB嘅瘤出嚟，成個人冇咁水腫，開心好多。𠵱家有睇營養師，又有食健康產品，最緊要身體健康。」
如果用一隻顏色來形容人生，她說：「我會揀彩虹，因為日日唔同，只要正面睇事物，所有問題都變為機會，最緊要唔好放棄自己。」
懂得感恩，笑容一定常掛臉上。
