北部都會區以創科作為焦點，幾項土地發展研究陸續上馬。其中新田科技城位處北都心臟地帶，連埋河套港深創科園有三百公頃地撥作創科用途，並同深圳福田對接發展；至於剛公布嘅牛潭尾項目，規劃重點之一係培育人才，另外會配合新田推動「產學研」合作，促進科研成果落地。

政府計劃於牛潭尾設立第三所醫學院。

北都大學教育城總共佔地八十公頃，其中牛潭尾將預留四十六公頃地作教育用途，係北都大學城最大一部分，會邀請本地、內地和海外大學申請開設新校舍或分校。最新一份《施政報告》並提到，計劃喺牛潭尾籌建香港第三間醫學院，而同區亦會有一間新醫院，用作教研醫院。

牛潭尾有醫院同醫學院，適合發展生物科技。據投資推廣署統計，二○一八至二○二○年間，香港生物科技和健康醫療初創公司數目飆升二點七倍至約四百間；而香港生物科技融資規模亦已攀升至亞洲第一。希望新醫學院落成後可以同新田科技城拍住上，促進本地生物科技成長。

香港一直未有大學城規劃，各院校分布港九新界各處。今次喺牛潭尾規劃大學城，會有不同大學進駐，政府希望鼓勵佢哋可以進行跨院校、學科、界別，甚至跨境合作，另外會探討設置一啲院校共用嘅設施，例如數據中心、會議場地、體育康樂設施、學生宿舍等，做到同一個城區嘅感覺。牛潭尾位於新田南面，日後北環綫落成，兩個地方只隔一站，方便大學城學生去新田創科企業實習，相信亦有助產學研合作。

我個人覺得，培育科研人才，書本知識固然必須，但更重要係實戰機會。參考美國研究機構Startup Genome《2023年全球初創生態系統報告》，新加坡排名躍升至第八位，首次打入全球十大，力壓上海、首爾、東京等亞太城市。成績得來不易，當地政府為加速創科發展，自一九九一年起已由產學研方向着手，推出《研究、創新與企業計劃》（RIE），推動業界同學界合作，將科技成果商品化。

既要育才，更要留才，完整嘅創科氛圍同社區連結最為重要。全球最成功嘅創科集群當然係美國矽谷，周邊圍繞多間知名學府，吸引大量科企慕名進駐。但近年礙於樓價飆升，加上交通基建不足，當地開始出現「極限通勤族」，即每日通勤時間高達六小時或以上，不乏初創公司同打工仔忍痛退場。作為「矽谷首都」嘅聖荷西近五年人口持續外流，去年更跌出全美十大。有世侄女住三藩市，喺蘋果返工，為咗唔嘥時間更要約晒啲視像會議喺揸車返工途中開。

因此一個完善嘅創科區需要有交通同生活配套。牛潭尾會有鐵路同公路，除咗上新田亦可直上福田，假如配合方便嘅過關政策，適合同深圳合作發展。至於生活配套，牛潭尾鐵路站附近計劃起一個綜合住宅社區，另會有河畔公園、單車走廊、康樂設施等，配套完整。