同中銀人壽執行總裁鄧子平（Wilson）多次傾談，講到人生規劃，佢都特別關注長者和退休安老問題。喺理財方面，「要幾多錢至夠退休」係經常聽到嘅問題，Wilson本身係精算師，但佢反而唔係用一個金額去衡量能否安心退休，因為每個人對生活質素要求唔同，好難一概而論，況且人普遍長壽咗，退休後可能要安排二、三十年後嘅生活，因此佢認為唔單止要計「夠唔夠」，更加重要係規劃一個適合自己嘅未來生活。

中銀人壽執行總裁鄧子平（左）。

財務安排仍然需要，但Wilson覺得呢一代人對退休後生活要求高咗，唔能夠只着眼於夠錢「養老」概念，而係要用退休「享老」作為規劃原則。另一方面，壽命延長亦令長者需要照顧嘅日子更長，對照顧者造成較大壓力，故照顧「照顧者」都係社會逼切問題。

針對呢兩個議題，中銀人壽上月牽頭成立「安心2gether」聯盟，同五個機構聯手規劃「享老」藍圖。聯盟夥伴來自不同範疇，加上香港老年學會會長梁萬福醫生擔任安心顧問，先由管理初老風險開始，到逆轉身心健康風險，並兼顧身心靈健康及財務安排需要。

相信好多「初老」或「中老」都會擔心日後患上認知障礙症，而坊間較常用嘅問卷和認知評估，到評估出認知能力下降，有機會已經係早期腦退化徵兆。聯盟夥伴康訊生物分析針對呢個痛點，同本地大學研發出全自動視網膜圖像分析（ARIA），透過拍攝眼底相了解腦健康情況，評估認知障礙甚至中風風險，準確度達九成。我趁住中銀人壽黃金時代展覽機會即場測試，過程只需十五分鐘。假如驗出有中、高風險，另一夥伴醫思健康可以跟進，提供合適醫療服務。另外PURE都係聯盟夥伴，可以提供適合嘅活動，幫助扭轉健康風險。如未有徵兆人士能提早了解自身風險，並積極防禦，可以延長享受健康人生嘅時間，同時減少對家人造成照顧壓力。

當然，任何人都會有患病或失去精神行為能力嘅可能，Wilson認為如果唔早作安排，隨時有可能變成「有錢窮人」。例如有真實個案，長者本身有資產，但因為失去認知能力無法動用財產，而家人又未獲授權，唔可以用長者錢財為佢提供更好嘅醫養環境。聯盟之中嘅安心三寶專門提供律師講座同諮詢服務，等長者了解訂立持久授權書嘅重要性，並幫助佢哋訂立授權書。

「安心2gether」聯盟剛成立，中銀人壽已着手進一步推進銀髮服務。例如集團本身喺大灣區已連結合作夥伴，未來計劃喺區內開發更多康養資源和服務。本地居家養老方面，集團亦會聯同更多戰略夥伴，為長者及照顧者提供更多支援，例如應用樂齡科技，為居家安老和出行帶來方便。另外，香港人鍾意旅行，集團正籌備全新概念嘅旅居享老計劃，令退休生活更多姿采。