現今雙職父母增加，生活條件提升，加上生育一個起兩個止，育兒使費越加慷概。平日幫小朋友報興趣班、補習班，甚至遊學團都花費唔少，買玩具更加捨得。中國係玩具製造大國，根據海關總署數據，國家玩具出口連續十幾年錄得增長，雖然上年因環球經濟下行而有所回落，但今年首四個月數字已極速止跌回升，出口額按年增六成。

玩具反斗城香港及台灣與特許經營合作總經理黃嘉歡（右）。

現時全球約七成玩具為中國製造，但我兒時五、六十年代，香港玩具工業亦曾風光一時。由於當年日本勞工成本漸高，歐美陸續將生產線轉移至香港，包括塑膠、鐵皮和超合金玩具等，令香港一度躍升為全球最大玩具出口地。不過我哋嗰一代小朋友並冇受惠，當時基層家庭普遍收入微薄，細路都係發揮創意自製玩具，如拍公仔紙、橡筋繩、雪條棒模型、抓豆袋等，係陪伴我哋成長嘅開心回憶。

八、九十年代成長嘅小朋友多咗一項兒時回憶，就係玩具反斗城帶嚟嘅全新買玩具體驗。玩具反斗城喺七、八十年代稱霸美國，並於一九八六年登陸尖沙咀海運大廈。最近我同玩具反斗城香港及台灣與特許經營合作總經理黃嘉歡（Pamela）傾偈，由卡通片講起。佢話昔日小朋友只能夠喺電視睇卡通片，渠道單一，卡通種類都唔多，但現今線上影視頻道多元，片類選擇繁多，孩童認識嘅卡通人物更為廣泛，其中CoComelon同Bluey係近年細路新寵。

不過兒童喜好變化分分鐘快過大人，所以Pamela話採購上必須緊貼市場走勢，一旦庫存滯貨就盡快促銷，並設網購清貨區，務求加速存貨流動性。雖然網購係大勢所趨，但佢留意到小朋友始終傾向親手選購心儀玩具，故實體門市仍有一定吸引力；至於成人客群則以目標消費為主，過程着重快捷便利，網購就能填補呢個空缺。另外公司喺玩具加入QR code供玩家掃碼進行線上、線下結合體驗，提高趣味性。

玩具並非小朋友專利，近十幾年電玩、動漫席捲全球，Kidult成為世界各地新興消費群。美國調研機構Circana有報告顯示，去年歐洲Kidult客群花費達四十八億美元購買玩具，佔該地區年度玩具市場收入近三成，成人市場不容忽視。而本港近年亦掀起一股盲盒潮，買完拆開先知抽到咩款式公仔，吸引唔少「大細路」入坑。

有見及此，玩具反斗城上月初開設全亞洲首家「生活．玩趣概念店」，主攻成年人喜愛嘅人物角色擺設同珍藏玩具。Pamela補充話店內主要陳列「童年回憶殺」，希望補償Z世代嘅童年願望；而為保持吸引力及新鮮感，門市將夥拍不同藝術家推出新產品。提到港人北上消費潮會否影響生意，佢反而無太大憂慮，由於北上消費一般以服務及體驗為主，較難帶大件玩具返港，因此對本港玩具消費仍具信心。