「唔怕你精，唔怕你呆，最怕你唔來。」係賭王何鴻燊名句。疫情確實曾令博彩客「唔來」，但疫情過後全球博彩業持續好轉，美國博彩業協會總裁兼首席執行官Bill Miller日前提到，雖然環球經濟仍未明朗，同時面臨利率高企同地緣政治緊張，但博彩業表現卻逆市抽升。其中美國賭業去年進帳達六百六十五億美元，創歷史新高；澳門亦不遑多讓，去年博彩總收入飆升逾三倍，恢復至疫情前六成水平。
陸叔攝於菲律賓度假區。
博彩業有助促進旅遊、零售餐飲業，因此近年亞洲多國陸續進軍博彩市場，如日本政府去年四月批准大阪興建全國首個賭場度假村，由美高梅集團牽頭經營，預計於二○三○年秋冬開業，目標年收入五千二百億日圓。泰國為吸引高消費旅客同投資者，近月亦正考慮賭場合法化，計劃打造八個綜合娛樂中心，以增加國家稅收，同時打擊非法賭博，如事成將成為第八個開賭嘅東南亞國家。
講到東南亞博彩版圖，菲律賓可謂後起之秀，當地博彩營運及監管機構PAGCOR公布，今年上半年博彩總收益逾三十三億美元，按年躍升兩成。其中以持牌賭場為主要收益來源，報告亦預料今年菲國有望超越新加坡，成為亞洲區第二大博彩中心。目前馬尼拉主要有四大賭場，包括Solaire、COD Manila、Okada、以及Newport World Resorts，市內匯聚多間酒店同賭場設施，恍如澳門路氹娛樂城。
隨當地賭牌門檻降低，近年有港資進軍插旗，其中國際娛樂（1009）主營酒店營運和博彩業務，上年獲PAGCOR發臨時牌照，獲准於馬尼拉營運賭場同發展綜合度假區Lavie Resort and Casino Manila，賭牌有效期為十年，且可予重續。
近日同幾個老友一齊出埠去馬尼拉度長周末，順道去呢個度假區參觀下。項目位處中部馬拉提區（Malate），前身已經係五星級酒店，總樓面面積逾七萬平方米，提供近四百間客房，部分面向無敵海景。度假區現正進行分階段翻新工程，並將擴大博彩區域，提供過百張賭枱和過千部老虎機，新博彩區預計於未來兩年陸續投入服務。
現時菲國經濟規模為東盟第四大，睇返當地旅遊部數據，今年上半年國際旅遊收入逾四十八億美元，按年升約三成二；其中韓國係最大客源市場，佔近兩成五，美國同中國緊隨其後，當地目標今年全年國際遊客達七百七十萬人次，長遠可為博彩業注入動力。為保障合法博彩業經營者，菲律賓總統上周更大刀闊斧，全面禁止所有離岸博彩運作，避免當地成為洗錢、誘騙等犯罪溫床，維持行業健康發展。
