港股於兔年元氣大傷，但股份回購卻空前熱烈。恒指公司上周喺網誌指，去年港股回購金額創歷史新高，按年增長兩成至一千二百六十億元（港元，下同）；今年首季回購額亦近三百億元。A股市場亦不遑多讓，單計去年第四季，已達四百○四億元人民幣回購額，按年增七成五。

林嘉麒、譚朗蔚、陸叔、郭家耀及黃偉豪（左至右）。

企業進行回購，一般具「定心丸」作用，以提振公司股價，並暗示短期內唔會配股。近年港股估值長期偏低，確係上市公司加持良機，根據彭博上月數據，恒指預測市盈率已跌至近八點二三倍，約為十年來低位。不過低迷市況下，加上外資外流持續，即使回購再多，散戶依然欠缺入市信心。

為刺激港股交投，上周出爐嘅《財政預算案》提出引入股票大宗交易；將人民幣櫃台納入港股通；免徵REIT印花稅等。宣布當日港股一度倒升，但長期可為股市帶來乜嘢結構性影響就仍待觀察。今期繼續同股評老友點評龍市走勢，今期有富昌證券聯席董事譚朗蔚（Stevan）、中薇證券研究部執行董事黃偉豪（Ravi）、匯盈國際資產管理董事總經理郭家耀（Matthew），以及元宇證券基金投資總監林嘉麒（KK）。

除咗政策影響，中美關係走向往往成為港股風向儀，近月再有企業陷入兩國角力漩渦。日前美國眾議院出招，擬限制聯邦機構與華大基因、藥明康德及其他生物科技公司合作，並指控其危及美國國家安全，拖累相關股份受壓。事實上，自二○一六年特朗普出任美國總統後，貿易戰、科技戰，乃至金融戰接連開打，特朗普再次參選更令中美關係進一步緊張。

中美博弈未有緩和，一眾嘉賓都趨向保守，預計恒指「龍頭悲觀、龍尾樂觀」。Matthew同Ravi認為全年波幅介乎五千點左右，下望萬三至萬四點，支持位為萬八點；Stevan更睇淡港股會跌至一萬○六百點水平。當中唯獨KK憧憬後市回彈，認為港股估值依然喺全球主要股市中墊底，將有利資金流入市場，上望兩萬五千點。至於板塊喜好，佢哋傾向中特估同油股，派高息兼夠穩陣；而龍年可謂AI硬件元年，半導體同手機設備股都可留意。

上星期提到美股、日股熱火朝天，幣圈亦迎來大牛市。美國證交會今年一月正式向現貨比特幣ETF開綠燈，批准於美國上市，加上地緣政治日益緊張，避險情緒升溫下，上周帶動比特幣於截稿日沖上「月球」到逾六萬美元，本欄出街日會唔會破二○二一年十一月嘅六萬九千美元歷史高位？KK分析，疫情期間部分中美洲國家將比特幣列為法定貨幣之一，應用層面同認受性有所提高，不過加密貨幣價格易受炒風影響，而且難以「數倉」，走勢波動較大，籲散戶謹慎為上。