香港口罩令解封將近一年，不過街上仍有唔少市民罩不離口，原來除咗保障健康之外，更有保護容貌之效。早前討論區有打工仔發文，話喺公司除口罩後，原本相熟嘅同事竟然漸漸疏遠，疑似被真面目嚇親。事實上，容貌焦慮成為疫下另類後遺症，因此自社交活動復常後，愛美一族急於執靚面容，帶動美容、化妝品需求呈報復式反彈。

奧思集團行政總裁譚肇基（右）。

回顧疫情爆發期間，美容業可謂五勞七傷，先後經歷多輪停業，一度長達過百日；加上口罩令持續降低扮靚意欲，導致部分中小型公司不敵寒冬離場。不過卻有公司視之為出擊時機，奧思集團（1161）逆市收購同行壯大業務，疫後帶動業績迅速反彈。截至去年九月底止，集團全年溢利按年急升六成五至約一點一億元（港元，下同）；收益則錄九點七七億元，按年增一成六。盈收穩健向上，派息亦不俗，末期股息為七港仙。

美容業得以逐步走出低谷，除咗靠市民齊心抗疫，當然有賴行內人苦苦支撐。本港第五波疫情一觸即發，無疑係業界最黑暗時期，集團行政總裁譚肇基（Alan）憶述，雖然停業多時，但深信行業有剛性需求，對疫後前景仍有信心。而為免流失客人，趁停業時加強店舖衞生措施，如增加更換用品次數；分流客人減少接觸機會；於更衣室增設空氣過濾機等，結果一開業便迎來報復式預約。

除咗鞏固既有業務，有見於市道低迷，集團亦把握時機擴充兼併購。其中於疫情高峰時承租銅鑼灣商廈一層樓面，佔地超過七千呎，作美容中心旗艦店之用。奧思集團目前在港共經營五十四間美容院，零售店則有十間，旗下品牌組合涵蓋歐美日韓。受惠於低價入市，使租金成本有所回落，僅佔整體收益一成七。

愛美之心人皆有之，疫下不論男女仍有護膚需要。Alan指，為填補停業期間的缺口，奧思集團線上線下同步發功，加強網店宣傳同線上服務，並邀請容祖兒同陳凱琳做代言人，帶動疫請期間網購生意仍錄得雙位數增長，當中以家用美容儀最為暢銷。即使復業後，客戶仍可透過官網預定美容服務，縮減輪候時間之餘更可省卻人手。

北上消費蔚然成風，水療養生同美容美甲更係唔少女士嘅主打消費項目。不過Alan認為本地醫美服務勝在有品質保證，醫生同儀器認受性亦相對高，唔擔心有爭客情況。佢反而話通關後見到有國內旅客慕名光顧，故未來將加強內地社交平台宣傳，以擴展內地客源。

作為集團第二代掌舵人，統領過千名娘子軍，親力親為係Alan成功之道。佢每年都會到訪意大利、日本及南韓等美容業強國，參觀展覽及觀摩最新儀器，並留意當地美容店嘅裝修等，務求為業務注入新「療法」。