疫情期間足足三年無得飛，通關後當然把握時間出走。其中澳洲天氣宜人，美食多元化亦抵食，係旅遊好去處；自從阿仔去當地讀書兼工作，我同太座得閒會過去小住，慢慢亦愛上呢度生活。而當地近年更成為置業熱點，上年我飛咗去澳洲三次，順道一探當地樓市潛力。
陸叔到訪金鼎墨爾本總部，與基金公司總經理Deep Kotak（左）對談。
澳洲樓市喺疫情解封後迅速復甦，房地產資訊機構CoreLogic數據顯示，澳洲去年全國樓價增長約百分之八，成功扭轉前年百分之五嘅收縮；而公寓同獨立屋租金分別升一成和百分之七點五。澳洲國民銀行亦有統計指，上年第三季海外買家佔近一成，其中以內地客佔比最大，喺樓市嘅投資日均八百萬澳元。
而根據澳洲外國投資審查委員會報告，墨爾本、布里斯班同黃金海岸等城市最受買家捧場。最近一次過去，得金鼎集團業務發展總監譚裕德（Stephen）帶路，同我參觀呢三個城市樓房。其中一站係布里斯班西面嘅米爾頓（Milton），區內充滿悠閑生活氛圍，精品小店、文青咖啡店、古董商行雲集。而且水陸交通完善，五分鐘車程就到布里斯班市中心，地理上靜中帶旺，近年唔少新盤坐落於此。
金鼎係一間扎根澳洲嘅中資發展商，Stephen帶我到訪集團墨爾本總部。管理層同我講解，做過江龍並非易事，更何況地產開發涉及規劃設計、施工、融資、營銷等，講求資金之餘，更重人脈同經驗。集團創辦人之一宋捷（Jay Song）自細喺澳洲讀書，加上管理層均屬本地薑，熟悉當地法規同營商環境，以本地化管理成功壯大業務。
公司初期為盡快站穩陣腳，以收買生地形式起家，將生地變成熟地後轉售予當地發展商，好快賺到第一桶金。其後業務逐漸擴展至地產開發、物業銷售、新興投資、基金管理等，形成更穩健嘅業務組合。
近年公司着力發展基金管理。作為普通投資者，要做發展商係遙不可及嘅事，金鼎就將門檻降低，為發展項目推出預售債券，投資者可定期收息，另外可以為發展方提供融資渠道，一箭雙雕。集團創立至今僅八年，截至去年五月，土儲已逾四千三百幅，可開發面積達三百七十公頃；整體收益超過五十億元人民幣。
至於市場前景，自疫情受控後，當地新移民、回流人士、留學生同海外專才激增，以致二○二二至二三年移民人口淨增長五十一萬人，創下新紀錄，房屋需求進一步拉升。雖然近期有加辣措施，但澳洲房屋署估計，未來五年將有超過十萬間房屋短缺，相信租金同樓價仍有增長空間。
講到買樓放租，我喺當地都投資咗一啲單位收租，上次途經託經紀約租客探訪，對方非常歡迎業主嚟探佢，大家相談甚歡。經紀話當地民風友善，業主同租客一般能維持良好關係，而我見到租客住得非常企理，當然更放心。
