發佈時間：11:00 2025-07-09
有一種呆，叫天然呆。
這種呆，是馬國明獨有的，但他不是刻意扮出來，更多時候，是他真的心不在焉。
馬國明和所有男人一樣，都愛看日本AV，更曾經有不少珍藏，不過都已變成往事。年半前他娶了妻子湯洛雯後，他說已不需要再看AV了，坦白得有如吃了誠實豆沙包。
他超級孝順，至今仍會拖着媽媽的手行街。當年因為媽媽很迷哥哥張國榮，母子二人於是一起加入了張國榮歌迷會。即使有人笑他是裙腳仔，他也不介意。
他坦認是「悶蛋」，除了踢足球，大部分時間都是「宅」在家，最愛的衣着是背心牛仔褲，最大的嗜好是湊貓。至最近這一年，因為「靚湯」湯洛雯的關係，他多了一個興趣：睇鬼片。
「我都估唔到我老婆咁鍾意睇鬼片，幾乎所有網上的鬼片我哋都睇晒，但佢睇鬼片又唔會驚，譬如睇《貞子》，佢反而會研究貞子點樣由電視框爬出來，爬出來會唔會好，哈哈。」
當天然呆遇上獨角獸（「靚湯」最愛的毛公仔），生活瑣碎都變得有趣。
這天，我發現馬國明還有多一個有趣之處，就是他拍照時，很喜歡雙手插褲袋。在攝影師影的訪問相中，竟佔了80%都是同樣的表情、同樣的插袋手勢。而翻看靚湯放上IG的夫妻合照，相中的他大部分表情幾乎是一模一樣的，只得靚湯獨自在努力擺甫士，令她也忍不住笑老公：「點解（表情）可以完全冇郁過？」
天然呆，不是浪得虛名的。
悶幾好吖！
有一種愛，叫馬國明和湯洛雯。
當帶點木訥的馬國明，碰上讀心理學的湯洛雯，她就有本事把老公緊閉的心扉，像剝洋蔥般逐片打開。
「佢的確好觸摸到我心理，幾容易撬開我把口。以前我即使對住女朋友，都好少講自己嘢；同佢一齊之後，我講多咗好多。有時佢睇我眉頭眼額知我唔開心，佢識引導我毫無保留去講我內心嘅感受俾佢聽，佢就係有能力令我信任佢，俾到我安全感。」
觀眾眼中的馬明很專一、唔花弗，但說白一點，就是悶。他聞言直認不諱，「我老婆都經常話我悶，不過佢又話悶幾好吖，可以成日留喺屋企陪佢。」
其實他和靚湯都喜歡宅在家，不用開工的日子，可以幾日幾夜足不出戶。「如果唔使開工，我哋可以成個星期都留喺屋企唔出門口，玩玩貓、沖咖啡、睇電影。我老婆好鍾意睇鬼片，最近又迷上鑽研咖啡，成日沖唔同嘅咖啡俾我飲。」
馬國明的專一，不是扮出來。近日靚湯重看老公發給她的電話短訊，竟發現有2000多個訊息都是用相同的示愛emoji。「佢同我講：『你睇你幾悶，又係send呢個俾我』，但佢其實好開心，呢啲係我哋嘅甜蜜回憶。」
老婆貪他夠「悶」，他則愛對方夠搞笑，「佢喺屋企睇睇下戲，會突然扮呢個扮嗰個，又扮得好似喎。我成日笑佢好適合做趣劇，只要佢遇到一個啱嘅角色，一定會演繹得好好。」
靚湯的大頭蝦，在他眼中都變得有趣，「佢有時行行下街會自己拗柴，好有趣，所以我同佢出街，我一定會拖實佢，咁佢就唔會跌倒囉。」
當情緒化的水瓶男遇上金牛女，吵吵鬧鬧也是情趣，「始終係人，當然會有情緒唔好嘅時候，但通常我哋一感覺到大家想嘈交，就會唔出聲，大家冷靜一下，然後可能佢去玩下隻貓女，我去玩下隻貓仔，就唔會再鬧落去。」
靚湯近日養尊處優，有傳她正努力調養身體，為生B做好準備。不過馬國明說：「養好身體又唔一定係為生仔，健康好重要。佢以前好夜瞓，有少少日夜顛倒，但同我一齊之後，就慢慢被我調整作息時間。我係好早瞓嘅，朝早4、5點又要起身餵貓，所以如果唔使開工，我哋夜晚9點幾10點就瞓。」
天然呆與獨角獸，都願意為愛去改變，「以前嘅我，唔會浪費太多時間在女朋友身上，要好多me time，但我𠵱家願意放多啲時間同太太一齊。我老婆都係，佢以前會要求男朋友遷就佢，𠵱家就會為咗我去改變自己。」
睇AV有咩問題？
網民認知的馬明，有兩大興趣，一是踢足球，一是睇日本AV。
關於足球，他說每次落場踢波，為的不是要贏，只是簡單地想出一身汗。「以前細個踢波，都會想贏，長大之後，踢波對我來講係一種運動。如果將來有小朋友，我會教佢比賽嘅意義唔係要贏，而係要接受輸，點樣在輸的過程中，堅持唔放棄，去令自己進步。」
關於AV，他直認是有看的。「曾經有一間外國知名大學做一項學術調查，訪問18歲未睇過三級片嘅學生，結果佢哋發現係冇嘅。好多情竇初開嘅細路，睇AV唔一定係為色情，而係出於好奇心。睇過就睇過，其實好正常，有咩問題呢？如果我話冇睇過，只係扮純情啫。」
沒有「偶包」的他，不怕被人笑「麻甩」，洗完頭唔吹頭就出街，背心與牛仔褲是他的最佳拍檔。「衣食住行中，我最捨得花錢係住，因為我有好長時間都留在屋企；而衣就會放到最後，我着衫好隨意，着到近乎殘先至揼，好多時着件背心就返工，反正拍劇都要穿戲服，背心比較方便，好多同事都知我係背心黨。」
這位51歲的「背心黨」，近日在劇集《執法者們》中，飾演廉政公署高級調查主任高浩然，劇中與陳豪是好友，私底下，他笑言「細細個」已經看陳豪（Mo）演戲。
「我讀中學時已經睇過阿Mo啲電影，其實你估唔到，當年讀書時，我都睇過一、兩套（陳）展鵬嘅電影。」
當年在熒幕見到的明星，如今都變了同事，原來全靠誤打誤撞。
馬國明小時的志願本是做足球員，曾代表校隊踢中場，贏過不少獎項，但因為媽媽一句「踢波搵唔到錢」，便令他打消了做球員的念頭。
中三隨家人移民加拿大的他，在哥倫比亞大學修讀機械工程學士，至99年回流香港時，適逢香港經濟低迷，寄出7、80封求職信都沒有回音。「我以前讀書都有玩戲劇，我見寄咗咁多信都冇回音，咁啱TVB藝員訓練班又招生，就寄去試下，點知真係叫我去面試，又真係收咗我。」
想做Benz雄
2000年藝訓班畢業後，他做過幾年路人甲、家丁、士兵等，「訓練班出來第一個job係《碧血劍》，我企喺門口，被關寶慧由城牆跳落嚟放飛鏢掟死。」
他還記得，曾在歐陽震華當主角的古裝劇《洗冤錄》做了10日死屍，又在黃子華為《男親女愛》拍的MV中扮小強，「我扮小強，拎住支魚骨扮彈結他，其實我都好想睇返，可惜已經搵唔返個MV。」
舊事重提，他仍難掩興奮，更笑言當年自己有個稱號，叫MTV王子，不少歌手如趙學而等的MV，都可發現其蹤影。「當年訓練班出來，有好多MTV拍，比主角更忙，由朝做到晚，四個廠都走勻。當時一年簽96個騷，結果我一年做咗140至150個騷，係好忙、好好執。」
新仔入行，拍劇NG是閒事，幸運是他沒遇過挑剔刻薄的前輩，主動提點他的倒遇過不少。
「當年拍《創世紀》，我飾演幫撈家（羅嘉良）炒股票嘅經紀Stanley，其中有次同撈家做對手戲，拍到凌晨3、4點，當時見到佢已經好攰，可能已踩咗好多晚通宵，因為是飛紙仔，而我又要講一大堆股票術語，結果我不斷NG，但係撈家仲好有耐性，叫我『慢慢來，唔緊要』，呢啲前輩嘅好，我係一直會記在心。」
Benz（許紹雄）曾經向馬明破口大罵，但馬明對他是萬分感激。「雖然佢當眾鬧我，但我感覺到佢係想我好。有次一齊食飯，佢同我講：『你寧願我𠵱家鬧你，抑或套戲出街之後等觀眾去鬧你吖？』當時我覺得佢好sweet，我知佢係真心想提點我。」
入行25年，他的人生目標，就是做許紹雄。「係！因為Benz嘅生活模式，我係好享受嘅。主角拍完一套戲，又要做訪問，又要顧票房，但佢唔使理，拍完轉身就走得，可以返屋企食飯，幾開心。」
馬明訪問完，返到屋企有碗「靚湯」等住自己，仲開心啦！
後記：我愛大屁股
「我成日都話……我成日覺得……」是馬國明的口頭禪。
「我成日都話，你睇1000次梁朝偉、周星馳嘅戲，你都唔會學到佢哋嘅演技，最多只係抄襲啫，反而睇多啲爛片，你會學得仲多，可以避免犯不必要嘅錯。」
「我成日覺得，做娛樂圈唔使太在意人哋講咩，大家笑一笑就算，都係提供娛樂俾觀眾啫。」
要娛樂大家，就要食得鹹魚抵得渴。所以，當他為宣傳迷你倉廣告，而在IG貼出一張執屋相時，網民即時偵探上身，在相中找出他睇寫真集的「證據」（左圖）時，他也無所謂。
「箱內嘅嘢都係廣告單位放入去，並唔係屬於我嘅，但既然網民認定啲寫真集係馬明嘅私人珍藏，咁你哋就當係我嘅啦，我唔會解釋，我又無乜所謂。」
馬國明的可愛之處，就是他說話夠真。正如他說，他不愛過分完美的米奇老鼠，卻愛唐老鴨，只因唐老鴨屁股很大。「我真係鍾意佢大屁股！而且唐老鴨夠真性情，會貪錢、發脾氣，又有少少好色，好人性化。」
在馬明身上，你又找到幾多唐老鴨的影子？
