香港以往有「不夜城」之稱，夜間經濟活動活躍，有茶餐廳通宵營業，酒吧餐廳不時客滿。不過疫情後港人習慣早歸，訪港客量復甦又未如預期，加上港人北上消費成風，以致本地消費市道火力不足，未夠十點條街已顯冷清，唔少餐廳都無奈提早last order。
香港餐飲聯業協會估計，每逢周末約有二十萬港人北上，業界晚市生意較疫前跌三成至一半。其實香港人一向鍾意出街食飯，傾下講下開心又一餐，不過有食客覺得內地餐飲夠創新，服務亦佳，面對跨境競爭本地餐飲業又如何應對？
美心集團首席營運官（香港及澳門）蕭德威（右）。
早前我搵咗美心集團首席營運官（香港及澳門）蕭德威（Keith）傾下市場走勢，順便了解集團最新營運策略。Keith分享，跨過疫情高峰後，美心集團餐飲生意已回復疫前約八至九成，不過礙於港人提早食晚飯已成習慣，晚市生意仍有待復甦。
為重振本地經濟，政府力谷夜市活動，如向旅客大派一百萬份餐飲消費券；復辦實體美酒佳餚巡禮等，亦有商場加時營業兼推夜間優惠響應，務求吸引旅客同刺激內需。Keith認為延長餐廳營業時間，可以做多一兩轉生意當然係最理想，但實際上都要視乎人流，同埋商場配合。
另一方面，雖然餐飲業正在復甦，但人手荒呢個老問題仍未解決。餐飲聯業協會指，疫前餐飲從業員有二十六萬人，疫情期間流失近六萬名人手，促使本地餐飲業加速運用餐飲科技去克服痛點。
美心集團早於幾年前已積極邁向智能化，旗下科技團隊增至達二百人，研究將科技引入樓面服務、生產同供應鏈等不同層面，務求簡化工作流程，同時減低人力成本。Keith以中菜為例，旗下有五十間餐廳已使用樓面機器人，而手機落單使用率則接近七成；另再喺手機應用程式加入人工智能，如根據會員過往消費模式，推介相應產品。
好多朋友飲茶習慣「剔」點心紙，但據Keith了解，食客正逐漸過渡去手機「click」點心，見得到港人都慢慢適應智能生活；但我同班中環朋友有時則會去大會堂美心飲茶，貪佢仲有點心車，畀我哋懷緬一下以前飲茶嘅模式。
食味創新固然係餐飲業首要任務，但美心進一步增強互動體驗。為鞏固年輕人市場，集團最近推出Web3美食手機遊戲eatie，玩家可透過遊戲贏取禮品或折扣優惠。自今年七月初推出至今，下載量已逾一萬二千次，更連續五日高居App Store香港地區歷險遊戲類前十名。
集團目前有近八十個品牌和超過一千九百家分店，分布全球各地，涵蓋中、西、日本菜、快餐、西餅同麵包等；另亦成功引進多個特許專營品牌，如星巴克店數目已達到九百間；而燒肉LIKE僅僅開幕三年，亦已火速開設十五間分店。美食反映一個地方嘅文化同創意，香港一向中西薈萃，相信能夠憑多元化飲食創出獨特味道。
