二十世紀初期，一班上海和廣東工業家帶住資金和技術嚟香港重新建立事業，推動香港經濟開始發展，到七十年代香港製造業達到全盛時期。不過一九七九年內地改革開放，情況逆轉，輪到香港工業家北上設廠，利用內地嘅土地和人力資源拓展生產力。
我認識唔少香港工業家，建滔集團（148）主席張國榮（Paul）係我好佩服嘅一位。乘改革開放東風，二十出頭嘅佢喺八八年去深圳蓮塘建立集團第一間紙覆銅面板廠。經過幾十年奮鬥，由一間山寨廠，至今坐擁超過六十間工廠，成為年營業額幾百億嘅工業王國。
數下手指同張國榮相識廿幾年，亦見證集團一路發展。建滔一九九三年喺聯交所掛牌，立刻馬不停蹄南征北討；○四年收購依利安達壯大下游印刷綫路板業務；○八年分拆建滔積層板（1888）上市。集團日前筵開近四十席慶祝上市三十周年，唔少政商界名人捧場出席，如全國政協副主席梁振英、律政司副司長張國鈞、民政及青年事務局局長麥美娟、滙豐銀行（5）主席王冬勝，以及同張兄相識五十年嘅劉鑾雄（大劉）等，當晚仲搵返上市保薦人（渣打亞洲）葉天賜嚟分享當年點滴，氣氛熱鬧兼溫情洋溢。
回顧創業辛酸史，台上嘅Paul憶述當年北上做開荒牛，冇水冇電，諗返起都一殼眼淚。由於當時綫路板嘅上游物料大多由台灣、日本同歐美進口，唔少化工原材料一到夏季就爭崩頭。為求提高生產自主性，集團逐步由銅箔、玻璃紗、玻璃纖維布、漂白木漿紙、環氧樹脂到其他化工材料一手包辦，到現在掌握關鍵技術，並佔盡垂直優勢，成為集團致勝之道。
當晚張兄話「傻嘅至做工業」，因為做廠好景時著重人力物力，不景時就考驗財力同毅力。學張兄話齋，做廠最緊要夠勤力，先可以帶領集團走過高山低谷。當晚大劉亦分享，張兄最令佢佩服嘅正正係佢非常勤力，所以當年如需要任何電子零件，打一個電話畀張國榮，就點都同你諗掂佢。好似當年大劉接到第一張風扇大單，但爭一樣零件好難搵，張兄最後都同佢撲到。
王冬勝亦憶述張兄嘅精力無人能及，多年前一晚佢同張兄參加晚宴，散場後張兄話要返公司，佢以為係返香港公司，原來張兄係上江門廠，仲話開車五、六個鐘就到，到達後剛好係朝早可以立刻開工。
建滔如今發展為全球最大覆銅面板生產商，以及全國化工產品龍頭供應商之一，更曾獲多項嘉許。能夠取得佳績，Paul感謝一班前綫員工夠齊心，同時印證「工字可出頭」。
昔日建滔每逢出業績，Paul都風雨不改到我節目接受訪問，但近年則逐漸由集團執行董事張家成（Eric）接手。年輕一代工業家買少見少，不過張氏二代勝在人才輩出，可望青出於藍勝於藍。如果話建滔係張國榮嘅人生標杆，家人無疑係佢支撐點。Paul基本上年中無休，畢生都為公司搏殺，在家時間少之又少，所以佢喺台上都不忘向太太表達謝意。
