首先恭賀《東周刊》二十周年以及全新東周網推出，網版專欄亦會喺九月底以新面貌同大家見面。
二○一五年三月，《東周刊》第六○○期，我第一次喺呢度開Chat，當時採用訪問形式，每星期請一位老友邊食飯邊傾偈，首集請來老友趙國雄去鏞記開餐兼開Chat，本來諗住講下後生點滴，點知佢將當年參加爭取中文成為法定語文和保釣運動，以至被退學，袋住百五蚊美金去加拿大讀書，甚至初初出嚟做嘢，親力親為試下與同事一齊揸貨車、送石油氣，點知畀阿媽見到被鬧等鮮為人知嘅故事，娓娓道來，成為非常精彩嘅第一期訪問。
到二○一六年，專欄改為由我自己第一身角度寫，範圍更闊。我有時會將刊登咗嘅專欄私訊畀朋友，如果嗰期係寫我個人事，例如當年讀書、第一份工、首次置業、旅行遊記等等，通常朋友圈嘅反應特別熱烈。亦試過寫咗某啲公司，對方見到發嚟短訊，有次被訪者話我知，專欄出街後佢喺美加嘅親友見到影低張相發返畀佢，話原來佢做緊呢個項目。呢個專欄間接幫我同被訪者聯繫咗唔少朋友，到東周網專欄改版後，期待呢個欄可以成為我同讀者嘅chat group（但緊記我並無任何投資chat group）。
另一個比較特別嘅回憶，係喺第六六六期寫港鐵（0066）。我本身喺港鐵上市時已經成為公司小股東，兩鐵合併時亦做過佢哋嘅小股東顧問，對呢間公司有特別感情，見到呢個特別期數就順勢寫下對66嘅一啲睇法。另外，我寫得最多嘅公司當然係匯豐（0005），因為係人生第一份全職工作，亦畀我最多回憶，包括求職、見工、實習、外展訓練、外調瓦努阿圖、正式工作等等，都係人生好重要嘅片段。
呢個專欄二○一五年啟動，但我同《東周刊》嘅淵源早於寫欄前已經開始。二○一六年十月，我寫咗呢段往事；話說一九九四年我代表大福證劵（現為海通國際）接受《東周刊》訪問，刊登後彤叔同我分析可以點樣用另一角度解構集團發展。當時係我第一次跟彤叔見面，估唔到因《東周刊》而牽線。
Magazine呢個字原本意思係倉庫，早期主要指軍備庫，後來用嚟形容定期出版嘅資訊和娛樂刊物，有資訊倉庫嘅意思。《東周刊》於我而言，則有回憶倉庫嘅意義，而翻閱其他作者嘅文章，亦等於參觀一個智慧倉庫。
有傳媒朋友講過，日報、周刊、月刊之中，周刊最難做，原因係日報最緊要快同貼，月刊強調分析評論，而周刊介乎兩者之間，快唔過報紙又深唔過月刊，如果挖到獨家料仲要小心跟進，慎防漏料。《東周刊》能夠做到精彩二十載實在唔容易，喺呢度我向雜誌團隊，特別係幫忙處理呢個專欄嘅財經編輯團隊致謝。
