最近「澳門朋友」Anita帶我們到氹仔舊城區何連旺街的「亞馬交餐廳」食澳門本土菜，餐廳離開官也街入口約一分鐘，隱藏在小小的橫巷內。開業數十年，只做晚市，可坐二十多人，是家類似私房菜的家庭式餐廳，型廚兼老闆Jose山度士四十多歲，是澳門本土人，傳承了祖母及父親的精湛廚藝，澳門本土菜做得出色，他跟母親在廚房做菜，樓面則交由兩位阿嬸負責，餐廳收的是街坊價錢，人均三四百元便食得非常豐富。
Anita是餐廳熟客，一早為我們發辦寫菜，想飲靚酒的話，最好自己帶來，是夜我們飲的是用葡萄牙紅酒做的Sangria。
晚餐首先食的是葡萄牙名菜馬介休球，每人一件，馬介休是銀鱈魚做的葡國鹹魚，大廚先用水烚過，減低鹹味，再跟薯仔蓉一起用麵包糠炸得外面金黃香脆，內裏鹹香軟滑，是很香口惹味的葡式前菜，一打賣三百元是物超所值。跟着食葡式白酒炒蜆，蜆肉鮮甜，加上白酒和薯蓉的香氣，一食難停，一百六十五元一大碟抵食非常。豬肉粒薯仔同樣是餐廳招牌菜，簡簡單單，但是意想不到的好味，一百九十元一大盤，抵食到暈。葡國雞當然要試，一隻賣三百八十元，半隻二百一十元。我們七個人點了半隻，夠食有餘，薯仔跟雞肉同樣美味，烘得皮脆熱辣的麵包蘸雞汁食一流。
葡式烤乳豬配有味飯
另一款必點的菜是特級紅豆豬手，二百八十元一大盤，想食此菜記得提早預訂。葡式烤乳豬配有味飯也是餐廳名菜，同樣需要預訂，乳豬一隻一千二百五十元，半隻六百五十元，我們七個人半隻也吃不完，剩下的當然外帶回家慢慢享用。另一款主菜是紅酒炆原條牛肋骨，汁香味濃。壓軸主菜是咖喱蟹兩隻，一隻膏蟹，一隻肉蟹，蟹肉鮮甜，加上香辣咖喱汁，配烘得香脆的豬仔包是星級美味，好食到飛起！
我們一行七人試了多款菜式，埋單三千元左右，每人不用五百元，食得心滿意足。
最Hit
