老，人人皆經歷；但要優雅地老去，卻不是人人皆做得到。
　　今年2月踏入60歲的施熙瑜（Lucy），曾以47歲高齡參選亞姐，早前又在社交平台Po出拗腰做一字馬的相，展示超柔軟的身軀，望落一點也不似「長者」，靠的是刁鑽的凍齡妙法，包括生食有機蔬菜、蒸煮低脂兼高蛋白質食物，每日仲要瞓足12個鐘，以及飲逾2公升Ph值7.2至7.8之間的礦泉水等。
　　嚴守此法20年的她，自言冇3高、冇老花、冇白髮，每年身體檢查的數字超「靚仔」，評級為30幾歲。對於登六，她笑言：「可以用樂悠咭享$2搭車優惠，又可以大模廝樣坐關愛座，好開心！」
　　身高5呎6吋的她，最難得是Keep到三圍數字36、26、37，體重長期維持在116磅。真正的美魔女，算是這種。

相關文章：美魔女李若彤狂掃山姆餅乾　空瓶推介$20保濕抗皺好物

相關文章：李麗珍偕女兒「姊妺」同框賀入行40年　靠「黃金5秒」煉神顏

相關文章：美魔女同框︱孖李英愛凍齡合體超震撼　46歲黃奕「小顏術」靠刮痧

擁有不老的心態

　　施熙瑜對於自己「登六」，一啲都冇唔開心，甚至唔介意被人話老。有次被6歲小妹妹知道她真實年齡後，對方拋下一句：「原來你咁老！」她聽後一笑置之，更自豪說：「我𠵱家可以大模廝樣坐關愛座。」
她又擁有一份不老的心態，「我成日都唔記得自己幾多歲，40幾歲時以為自己係30幾歲；到50幾歲時，又以為自己係47歲，皆因呢個歲數選亞姐，印象特別深刻。」

上網查食物成分

　　做到人老心不老，全靠她對自己要求極高，飲食方面更是精挑細選。每樣能放入口的食物，她都要仔細上網查清楚標籤成分，如果冇益的，就堅決不吃。為此她放棄了愛吃的午餐肉和杯麵，她直言：「對上一次食即食麵已經係20年前。」
　　她每一日都要食足夠的蛋白質和纖維，肉類均以白肉為主，如雞肉、火雞肉、魚肉、蝦、鮑魚和帶子等；蛋白質食物則有雞蛋、豆腐和豆等；蔬果只限食有機，並盡量生食；飯只會食一餐，除了白飯，其他有顏色的米都會食。而進食也有次序：「例如1個禮拜內我今日食咗蛋，第2日就食雞肉，第3日食魚肉、第4日食豆，第5日食豆腐，因為我擔心重複食肉會食得太多。」有時想快速修身，她只會吃午餐。

烹調方法好講究

　　對烹調方法，她亦有講究，只會蒸或焗，普遍不放任何調味料，有時怕魚肉腥，才會落少少鹽和胡椒粉；想食烤肉時，才會搽少許橄欖油落錫紙去焗。不過間中也有放肆的時候，「如果想食薯片，我會買一包成分健康嘅慢慢咁食一個月；唔開心時會畀自己飲朱古力加咖啡，但只可以3個月一次。」
　　每個月，她只會約朋友食一次飯；如果多過一個飯局，她去到只飲杯嘢、傾吓偈，絕不進食。飲水每日最少飲2公升水，且只會飲Ph值7.2至7.8之間的礦泉水，絕不會飲水喉水。她覺得瞓覺都好重要，每日要攞一半時間即12個鐘去瞓覺，無論幾點瞓，都是睡到下午2時才起床，她笑言：「我瞓唔夠會暈舵舵，諗唔到嘢，個腦轉唔到。」

控制飲食最重要

　　臨睡前和睡醒後，她習慣拉筋，主要做幾下狗仔式伸展和5分鐘平板支撐，她說：「平板支撐對坐骨神經好，我由最初只係數100下，到𠵱家可以同人比賽。」問她是否也有做運動Keep Fit？她笑言：「我考咗健身教練同瑜伽教練牌，跟住就懶叻，因為心急練老鼠仔，日日去舉重，最重時舉到35kg，結果兩隻手臂畀我舉傷咗，要唞1年做物理治療。跟住做瑜伽學拉一字馬，一拉到太開心，點知又拉傷咗！」
　　因傷暫停運動後，除了拜拜肉走番出嚟，身形和體重沒多大變化，才發覺運動幫助Keep Fit原來唔夠飲食大，「我睇過一啲研究，話飲食可以幫助控制體重係8成，運動只係2成。」現時運動對她來說，只是修身形，令肌肉結實一點。

門市購買才可靠

　　護膚方面，她稱基本的清潔、搽Cream和敷Mask都會做，好友陳法蓉教她面膜平或貴都要日日敷，故她一星期會敷3至4次；而Cream由幾千蚊至百幾蚊都會用，她坦言：「最初用幾千蚊，但用到咁上下冇進展，就會換一樽平啲嘅，啱啱用時覺得好大進步，用用吓又冇乜進展，又會換另一個牌子。」她又會日日搽防曬，出外時每兩個鐘補一次。
　　至於選擇品牌的要求，她嚴選消委會評級頭3位的產品，大前提是不能有防腐劑，「我絕對唔會上網買Product返嚟用，就算水貨平啲，我都會去門巿買，因為個店員會解釋得清楚，萬一用咗有咩問題，佢會知用咩方法處理。」為了令頭髮烏黑冇白髮，她30歲時已開始食補充品，亦會多吃黑芝麻、黑豆和何首烏。

學習其他美魔女

　　施熙瑜坦言，現時最滿意是自己的身形，進步空間是條腰可以再瘦啲，「唔好少過25吋，但又唔好多過26吋，瘦咗唔好縮胸，因為我鍾意上圍豐滿啲。其實三圍相差10吋係最標準，𠵱家三圍係36、26、37都算標準。體重最好係112磅同120磅之間，𠵱家116磅左右都ok。（是否美魔女？）我唔覺得係，對我嚟講，羅霖同余安安先係，因為我唔夠美。」
　　她更稱64歲的余安安是她的學習對象，「佢曾經話要搽Body Cream保持滋潤，我即刻跟住做；而生食蔬菜就係學一個外國70幾歲嘅黑人做，佢望落好後生。」

Keep住單身唔拍拖

　　現時她有教書，包括教老本行時裝設計，以及AI人工智能和整網站等，有時還會幫其他設計師做兼職售貨員。問她有否拍拖？她斬釘截鐵說：「冇，愛情通常都係傷害我嘅，我發覺放棄咗心境會好啲，最後一次拍拖係44、45歲時，（但你54歲時喺fb招親？）因為葉家寶太吸引我，當時如果遇到佢咁嘅質素，我會考慮，但𠵱家咁嘅歲數唔好喇，搵個年紀大過我嘅，又要我照顧佢；差唔多年紀嘅，大部分都有3高，又要我照顧佢，我覺得單身可以輕鬆啲，最好了。」