小念頭，大成就。人稱「毛姐」的影后毛舜筠，在影壇所向披靡，突然跨過界，踏足時裝界當新人，60天內打造「Innotier x MOMOZONE」抗菌時裝系列，在澳門時裝節首次登場，令人嘖嘖稱奇，一切從口罩開始。

在澳門接受東周網專訪的毛姐，說在疫情期間，所戴的口罩，是以專利純銀線編織、秒間抑制及殲滅99%病毒包括新冠病毒的可重用口罩Innotier，因可多次使用兼可防病毒，令向來愛環保的毛姐情有獨鍾，有次和品牌老闆兼好友林曉盈（Juliana）閒談時，忽發奇想。毛姐說：「我同Juliana講，可唔可以做一啲衫，幾時着都得，即係返屋企沖涼瞓覺，第二日可以着番同一套、加件背心就可以出街？喺屋企着得舒服，出街又型又靚，最好係我、我個女，又或我阿媽都啱着，好睇又有型。Juliana一直記住我呢個諗法，有一日佢同我講，不如出個系列，但時間唔多，fashion week就快嚟！」

就是短短的60天，孕育了毛姐和Innotier聯乘的抗菌時裝系列「MOMOZONE」，在日前舉行的澳門時裝節中，展示系列具8大專利功能的T恤、褲、背心、羽絨背心、袋和帽等。「設計最大元素係要舒服！平時我好少着緊身衫，舒服係最緊要，件衫幾靚都好，如果着得唔舒服，我唔會再着多次。第二，係着出嚟要young，係要比我年紀young！第三，係要fashion，着出街唔會失禮人，出街都型。」毛姐說。

丈夫是著名美術指導及導演區丁平，毛姐笑說在大師培訓下，不容有失！「我衣櫃嘅衫，全部都係黑白呢類素色，但會喺襪、scarf、帽呢類配飾花心思，點綴total look，我本身有個造型大師，就係我老公，我都受訓咗幾廿年，所以有好多感染，如果我失手，就會感受到有啲眼神，哈哈！無論衣着或生活，我都係偏向簡約，簡單得嚟要有style。」

終生學習保持正能量

雖然毛姐說喜歡簡約生活，隨心而行，但她相信終生學習，不斷自我提昇，才可保持正念及正能量。「唔需要刻意去學一啲好特別嘅嘢，只要你願意喺日常生活，學習新事物就夠。我喜歡煮食，我會睇吓有咩新菜式，主動去研究。我好少食澱粉質，但我丈夫喜歡食麵包，我就搵到原來Sourdough（酸種麵包）對腸道有益，同埋發酵過程中係分解好多糖同澱粉質，唔會好似一般麵包，食咗之後令血糖提升，因為咁我一直鑽研。」

「好多朋友都話我整嘅麵包，喺出面係食唔到咁好食，但我又唔想變成一盤生意，我想生活冇壓力。整麵包令我有自己嘅空間，係減壓同享受，將麵包畀朋友或家人，見到佢哋好enjoy嘅表情，令我開心到不得了！每一次囡囡返嚟香港，最掛住就係屋企嘅麵包，我屋企好似bakery咁！」毛姐說。

「跳Hip Hop令我不斷笑」

毛姐的笑容充滿陽光氣息，舉手投足更是活力無限，自言是「運動人」的她，熱愛運動的程度，可說是女星之冠。跑步、踩單車、打網球、跳繩、瑜珈等，甚至跳Hip Hop，全都是她熱愛的運動，渾身是勁。毛姐說：「點樣可以保持開心同正能量？運動係好緊要！由年青到依家，都嘗試唔同嘅運動，例如跑步、踩單車，因為我知道心肺運動好重要，日日跑2個鐘；如果踩單車，會踩得好快，好鍾意聽到嗰種『揈揈』聲，跌都唔知跌過幾多次。我又喜歡打網球，一個星期打7日，諗返以前真係幾癲。」

「我好鍾意跳舞！其實我好喜歡音樂，雖然我唱歌係冇天份，但我一聽到音樂就開心，當然唔係大戲啦，哈哈！例如Hip Hop，大家可能想像唔到我會跳Hip Hop，因為我唔係嗰種style，但唔知點解我好鍾意Yo！從來冇試過幕前跳Hip Hop，因為我只係享受個環境，同一班人一齊跳，好享受嗰份快樂，我喺嗰刻係不斷笑，我跳咗4年，仲考咗張證書！」毛姐說。

Lagree運動強化肌肉

毛姐的運動清單上，一年前，加了這種運動：Lagree。Lagree是透過多用途Megaformer健身器材進行，按照專業教練的指導，進行不同的力量訓練、Pilates等動作，非常有效率的訓練全身每個肌群，如腿部、核心等，達致肌肉強化和體態雕塑。

毛姐的小女兒是攻讀物理治療，一年前她建議毛姐做Lagree。「囡囡話呢個運動係喺一部機上面做，而呢部機喺做物理治療嘅地方都有。囡囡推介呢個運動，係因為見到好多人只着重心肺運動，但忽略咗肌肉操練，尤其係年紀較大嘅人，因為一直冇操練肌肉，所以Core Muscle（核心肌群）、大腿位置係較為弱，好易跌倒，隨時造成跌親後腦、盆骨碎裂等。跌親，係因為肌肉唔夠強。」

「上咗一堂，我即刻同囡囡講：『好難呀！好辛苦呀！』聽唔切個指示，好lost，痛咗好多日。但囡囡畀我好大嘅鼓舞，佢話：『媽咪，你使乜做到100分？你啱啱開始，點解唔慢慢pick up？呢個運動係可以做到老，所以唔需要急！』如是者，我做咗超過120堂，一堂45分鐘，每星期我做3堂。呢個運動係有超過1千個variations，唔會令你覺得做夠或做晒，永遠都可以進步。

我成日被媽咪或身邊人話我寒背，叫我企直啲，其實唔係叫我嗰吓，就可以挺直，係根本我嘅肌肉唔夠強，做咗Lagree一段時間，係改善咗寒背。我囡囡話我腳太瘦，我反問腳瘦唔係好睇咩？囡囡話要有肌肉先至得！就算我以前做咁多運動，我散步行斜路時，一樣覺得好吃力，但做咗Lagree之後，我可以跑上斜路！肌肉比之前強壯好多。」

少糖為妙

下月踏入63歲的毛姐，是逆齡界的表表者，愈活愈年輕，駐顏有術，其「逆齡餐單」是少糖、多吃維他命D3、MK-7及鎂的營養補充品。

「好多人問我點解keep到咁後生，其實飲食習慣係非常關鍵，係要聰明選擇，令你唔單只係健康，仲要食得開心。糖同澱粉質，係兩大令人衰老嘅原因，糖化，會令皮膚唔靚，仲令身體機能出事，食得糖份多，生cancer機會都大啲。我唔係話完全戒糖，亦都唔係一啖飯同麵包都唔好食，而係盡量少食，又或食阿洛酮糖（allulose）。」

「我每日會食supplement，係必需要食，以我年紀，我食嘅量都大，我食到1萬個IU，先至有功效。好多研究證明維他命D3對身體有好多好處，如防止腦退化症、防癌症等，而鎂都好緊要，可以幫助減壓。睡眠好重要，我每日要瞓8個鐘。如果瞓唔到，要諗吓係咪冇足夠嘅運動令你好攰去瞓。有啲醫生提倡可以透過食物吸收維他命，但我相信食物加supplement先至夠。以我運動量咁大，我會食更多有豐富蛋白質嘅食物，如蛋、牛扒、雞。」

毛姐說：「我識得去錫自己，做一啲對自己健康嘅嘢。」錫自己，三字概括愈活愈精彩的要訣。討好自己，比起討好別人來得更重要，找到屬於自己的熱愛，自然自帶光芒，forever young。