發佈時間：13:20 2026-05-16
近日一名黑衣「伸手黨」騙徒懷疑連日在元朗一幼稚園外，頻繁地向路人討奶粉錢。有港媽煩爆大呻：「每日問4次，問咗成個星期」。而一位正義的大叔，憑一肢體動作幫助街坊解困，免受騙徒欺騙，成功保住荷包。
帖文一出，不少街坊都認出這位「伸手黨」，留言指「啱啱都問咗我」、「半個鐘前被佢問完」、「琴晚都見到佢，好險」、「實時14/5，7:45 citi bank附近」、「晚上都見啦，大馬路恒生附近」、「呢條友之前喺千色嗰頭都係咁問人拎錢」、「姐姐我支持你，我都成日見到呢個人問人借錢」。
街坊網民並大爆與「伸手黨」交手的不同「伸手」故事——
•佢琴晚問我可唔可以幫佢，我啋佢都有味。
•我嗰朝都見到佢，佢連街邊停車嘅人都唔放過😑。
•佢啱啱都有問我，我見到有個揸馬經阿伯Ｘ走咗佢…
•呢條友上次搭巴士（已上車）問人攞錢俾車費，攞到錢就出返巴士。
•我尋晚凌晨1點幾放🐶～佢問我有冇100蚊 ～前後今日已經問我第3次～
•好彩睇到呢個post（帖文），啱啱喺巴士站見到佢！佢一講唔該我就走。
•尋晚收工8點幾喺大馬路近勝利牛丸外遇到佢，都係問可唔可以俾少少錢佢。
•頭先大棠道輕鐵站等緊過馬路，佢都走埋嚟問可唔可以幫下手⋯答佢：唔會幫你，走開。
•上次零晨4點等緊巴士返工，都遇過佢一次，佢問我可唔可以俾幾蚊佢坐車，我答佢我連八達通都無🤫。
•前晚同老公經過，佢喺幼稚園跟到我哋去惠康門口，見我哋入咗去惠康佢就行咗去第二度，點知買完嘢出嚟又見到佢，佢就問可唔可以幫個忙。我老公兇佢佢先話唔好意思，之後見佢又走去問第二個…
網民：叔叔揮手叫我哋唔好理佢
有網民特別提到「嘩，早兩日佢都有走埋問我可唔可以幫下佢，好彩我無理佢😂」、「一開始我都諗緊佢係咪有啲咩要幫，然後我見前面個叔叔係咁望住我哋揮手叫我哋唔好理佢，所以就冇理到😂😂」。
另有好心網民提醒「其實哩啲人。你最好就唔好理佢，佢日日都係咁問人，精神多少有啲問題，你更加唔好追住嚟影，如果佢突然發癲打你。到最後受傷嗰個只會係你，所以影咗就走，小心啲，你自身安全最重要！」。
資料來源：pakyiu1221＠Threads
立即追蹤《東周刊》全新WhatsApp頻道，緊貼全城熱話、突發猛料、獨家消息！
https://bit.ly/4gnvlZf
