發佈時間：17:20 2025-12-13
公屋婆婆玩命晾被！有熱心街坊昨日（12日）在社交平台Threads上載一段短片，顯示一名婆婆將上半身探出窗外，將被晾曬到晾衣架上，動作極為驚險。樓主表示自己一看到便立刻大喊阻止婆婆，未料婆婆竟笑着回應「有心啦」，卻沒有停止危險動作，最終樓主決定這麼處理！
樓主憂婆婆失重心跌落去 「目測應該住19、20樓」
據樓主指，涉事婆婆住在其對面大廈，且已非第一次進行這種高危動作﹕「我已經大叫佢唔好咁做…但佢唔聽仲笑話『有心啦』。好擔心同驚婆婆失重心跌落去！」樓主接着呼籲網民「幫幫我搵依位婆婆仔女」。
樓主隨後在回應欄補充，指「搵咗一陣同徘徊咗一陣，已搵到婆婆樓下保安，保安姨姨已影低婆婆樣，會上樓提醒婆婆唔好再咁危險，我盡咗力，希望婆婆聽勸…我啱啱同保安姨姨喺樓下望上去婆婆單位，目測應該住19、20樓…如果一個唔小心失重心跌落嚟，真係係咁先…多謝各有心人協助幫忙」。
樓主亦表示，「我知咁影好唔啱，但我真係唔想有一日發生嘅意外會出現」，坦言「唔忍心婆婆因為晾衫咁跌落去…活到依個年紀得來不易，幫得幾多得幾多」。最終樓主「決定陣間食lunch（午飯）去對面棟樓搵保安要搵婆婆住邊！因為我知佢收張被，又要擒出去」。
網民分享類似悲劇 直呼好牙煙
事件引發不少網民共鳴，有人更分享了類似悲劇案例：「幾年前我樓上嗰個老人家都係因為咁樣而跌落街過咗身」、「我隔離鄰居早幾年就係咁樣跌咗落樓走咗」、「我姨丈個爸爸個妹30幾年前就係咁樣跌落樓冇咗」。
有人亦附和，「其實好多跌落街都係晾衫出事，佢個動作太危險」、「佢成個人重心已經出晒去，基本上每一秒都係賭緊命」。有網民更直呼「哇好牙煙！萬一失平衡或者個鐵架承受唔住重量就出大事」，樓主亦回應「真係…公屋晾衫架係好脆弱」。
此外，有網民大讚樓主的義行﹕「你好好心，好人有好報！」「婆婆咁樣晾衫好牙煙，你見到有提醒佢，好有心，係大愛，依家社會好需要，多謝你」。
另有網民出謀獻策﹕「同佢嗰座嘅樓下保安講聲，叫佢同婆婆講，咁樣好危險，若果知有其他家人嘅話，叫個保安提提啲家人，唔少空中飛人意外就係咁發生」「如果可以嘅話，你話俾佢聽，你見過樓上有人掉煙頭落嚟，佢就唔會再晒衫出去。」
資料來源：mimichelle_kong＠Threads
