發佈時間：19:50 2025-09-03
多個社交平台近日流傳一段名為「城巴B3A香港20分鐘旅遊攻略」的影片，當中有數名疑似嶺南大學學生，在乘車期間因無撳被飛站而大鬧巴士。不僅指罵車長，還威脅投訴「讓你下崗」，最終車長被迫駛回。事件引發關注，有網民爆出真相，直言「司機大哥係啱架」。
據指，涉事的城巴B3A路線往來山景邨及深圳灣口岸，中途會在鄰近嶺南大學的富泰邨站停站。而從網傳影片可見，有多名男女走近車長駕駛座位置，指責車長沒有在停富泰站停站。有指幾人疑為嶺南大學學生，誤會該車是以富泰邨為總站的特別班次。
片中一名操不純正廣東話的女子指罵車長：「你唔知你開呢班車？你唔返去，我今日投定你，我同你講！」車長邊駕駛邊回應：「你咪走返去囉。」一名男子隨即以普通話大喝：「我們坐了兩年了！」女子再斥車長：「我同你講，呢班車8點半係剩停嶺南大學，你明唔明？！」
車長這時攤開手說：「你哋又無人撳鐘喎。」暗示飛站是因為沒有人按停車鐘，有關男女當即鼓譟起來，有男子以普通話罵道：「回去呀！」女子再警告車長：「你聽清楚，你今日唔車我哋返去，你走唔甩㗎啦，我就鬧定你！」男子也威脅說：「看這麼多人，夠不夠讓你下崗！」女子又說：「呢部車全部人都係去嶺南大學！」
車長再解釋：「你哋又無人撳鐘，我咪照行囉。」男子即反駁：「最後一站就是富泰啊！」車長即糾正他：「我哋呢班係全程B3A。」但女子反駁道：「你呢個邊到係全程B3A，你呢個係特別班呀！」車長見無法申辯，最終妥協：「咪轉返去大學，咪聽你講，轉返去大學囉。」女子仍不罷休，並改用普通話向在場乘客說：「大家舉報吧，如果不舉報，以後每一天都會這樣子的了。」
「撳鐘落車？真係好笑...」
女子隨後還反問車長：「咁撳鐘做咩啫？」車長答：「撳鐘停車囉。」女子謂：「撳鐘落車？真係好笑，終點站就是富泰。」車長這時大聲說：「巴士係咁㗎。」女子嘲諷道：「好笑，這個人。」
網民：車長無錯，特別車只限上課日
帖子甫曝光便引發熱烈迴響，有屯門街坊指出，涉事學生誤會該班是特別車，「因為成班人無睇另一張通告，去到8月29日都係用學校假期時間表，所以係無8:30富泰終點站嘅特別班次，司機大哥係啱架，佢原本係諗住繼續去下一站五柳路」。
「公告講明，特別車只限上課日，再講所有巴士資料係APP都查到，仲話自己係大學生，個學位都唔知係唔係呃返黎，成班文盲。自己7咗，仲咁大聲惡司機。」
此外，城巴乘客須知列明：「請勿以恐嚇、辱罵或淫褻性的言語或動作，或以任何其他方式騷擾車長或車廂內之乘客，故意妨礙車長可構成犯罪。」有網民便質疑他們可能違例：「騷擾司機開車好大罪喎，呢位呀姐連落車要撳鐘咁基本都唔識，仲喺度嘈嘈閉。」「咁激動會影響行車，全部唔好走，報上台慢慢玩。」
來源：車camL(香港群組）＠facebook、tuenmunlocals＠Threads
